भांगरभूंय | प्रतिनिधी
नवी दिल्ली, खबरां संस्था: देशांतल्या सगळ्यांत व्हड फोग उत्पादनाचें केंद्र आशिल्ल्या तामिळनाडूच्या शिवकाशींत दिवाळेक आदीं आसताली तशी अंदूं उलाढाल ना. देशांतलो ८५ टक्के फोग हांगा तयार जाता. पूण २०१९ वर्सा पयलीं मेळिल्ले ऑर्डर आतां मेळनात. कोविडा आदीं जशी फोगाक मागणी आशिल्ली तशी आतां मेळना. फाटल्या वर्साचे तुळेंत अंदूं मागणी १५ टक्क्यांनी उणी जाल्या आनी उत्पादन ३० टक्क्यांनी उणें जालां. हाचे फाटल्यान २०१८त ग्रीन फोगा विशीं सर्वोच्च न्यायालयाचे आदेश आनी दिल्लीं दर वर्साची बंदी हाका लागून फोगाचो बाजार उणो जालो, अशें इंडियन फायरवर्क्स मॅन्युफॅक्चरर्स असोसिएशनाचे अध्यक्ष एस. श्रीराम अशोक हांणी सांगलें.
फोग उत्पादनांत चीना उपरांत भारताचो दुसरो क्रमांक. तातूंतले ९० टक्के लोक चेन्नय सावन ५०० किमी.अंतराचेर आशिल्ल्या शिवाकाशीच्या ल्हान शारांतल्यान आसात. हांगच्या फोग उद्देगांतल्यान ३ ते ५ लाख लोकांचें पोट चलता. पूण फोगाच्यो ऑर्डरी व्हडा प्रमाणांत देंविल्ल्यान हुस्को निर्माण जाला. तमिळनाडूंतल्या विरूधननगर जिल्ह्यांत फोग तयार करपी ११७५ कंपनी आसात. शिवाकाशींत ३०० परस चड कारखाने आसात. २०१८ वर्सा ७०० कारखाने आशिल्ले. फाटल्या वर्सा ४-५ हजार कोटीं मजगतीं येणावळ मेळिल्ली. अंदूं उत्पादनूय उणें जालें. ऑर्डरीय उण्यो जाल्यो. अंदूं ३ हजार कोटी मेरेन येणावळ मेळटली असो अदमास आसा. असोसिएशनाचे के. मुरली असाईथाम्बी हांच्या म्हणण्या प्रमाण सर्वोच्च न्यायालयाच्या आदेशा उपरांत उत्पादकांनी ग्रीन फोग करपा कडेन लक्ष दिलां. माय बेकायदेशीर फोग उत्पादक वाडले.
रंगांत पोटॅशियम नायट्रेट घालतात
श्रीराम हांच्या मतान सर्वोच्च न्यायालयाच्या आदेशा उपरांत फोगांत बेरियम नायट्रेट मिसळयनात. कारण तो वारें प्रदुशणाचो मुखेल घटक. देखून पुराय बाजारपेठ ग्रीन फोगाचेर लक्ष केंद्रीत करता. पूण सादारणपणान ग्रीन फोग फुडले उपरांत पांचवो रंग नासता. कारण पाचवो रंग फकत बेरियम नायट्रेटान मेळूंक शकता. पूण ताचेर निर्बंध आसा. देखून सध्या पोटॅशियम नायट्रेट निळें, तांबडें, हळडुवें रंगांत मिसळून घेतात. ताका लागून पांचव्या रंगाची छाप येता, अशें फाटल्या ३० वर्सां सावन शिवाकाशींत फटाके उद्देग चलोवपी गुणसेकरन हांणी सांगलें. ग्रीन फोगांतल्यान चीनी फोगा परस ३० टक्के उणो धुंवर भायर सरता. तशेंच तांच्या उत्पादनांत रसायनां उणीं आसतात. अंदूं उत्पादन ३० टक्क्यांनी उणें जालां. कारण जायत्या कारखान्यांक परवानो ना. ल्युमिनियम, सल्फर, कागद हेर कच्च्या मालाचे किमतीचोय हांगा परिणाम जाला.
अंदूं २४० शॉटचो फोग खाशेलो
विरूधननगरांत अंदूं २५०० किरकोळ विक्रेते आसात. फोगाच्यो ४५० परस चड जाती आसात. सगळ्यांत खाशेलो म्हणल्यार २४० शॉट फोग. तो ३५ मिनटां अखंड फोग मारता. तशेंच मळबांत मोराच्या पिसाच्या आकार घेता. तो एका मिण्टा परस उण्या वेळान ३० मराण्यो फुटून मोराचें पिसां तयार करता.
ऑनलायन फटींगपणांत वाड
जायत्या वेबसायटींनी शिवाकाशीच्या फोगाच्या नांवान फोग विकपाक सुरवात केल्या. फाटल्या वर्सा चेन्नय आनी कोयंबटूरांतल्या आमच्या पोरन्या गिरायकांनी १० ते १५ हजार रुपयांची ऑनलायन ऑर्डर दिली. पूण तांचो फोग नकली थारलो. ऑनलायन विक्रेते फोग दाखयतात. पूण पयशे घेतले उपरांत लेगीत ते इतलो फोग धाडनात. तमिळनाडू सायबर गुन्यांव खात्यांत हे विशीं १७ कागाळी नोंद केल्यात, अशें पेथुलुपट्टीचो वेपारी एस. मुरुगेसान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
