भांगरभूंय | प्रतिनिधी
नवी दिल्ली ः देशभरांत ७६ वो प्रजासत्ताक दीस उमेदीन मनयलो. सगल्यांत पयलीं दिल्लींत प्रधानमंत्री नरेंद्र मोदी हांणी युद्ध स्मारकाचेर वचून शहिदांक आर्गां ओंपलीं. उपरांत प्रजासत्ताक दिसाचे परेडींत वांटो घेवपाक ते कर्तव्य पथाचेर पावले. दुसरे वटेन राष्ट्रपती द्रौपदी मुर्मू, इंडोनेशियाचे अध्यक्ष प्रबोवो सुबियांतो हांचे वांगडा घोड्यांचे बग्गीत बसून कर्तव्य पथाचेर आयली. तांणी राष्ट्रपती म्हूण तिसरे खेपे राजपथाचेर तिरंगा हुबयलो. अंदुच्या प्रजासत्ताक दिसाची संकल्पना ’भांगराळो भारत: दायज आनी उदरगत’ ही आसा.
संस्कृती मंत्रालयाच्या सांस्कृतीक कार्यावळीन मिरवणुकीची सुरवात जाली. ३०० कलाकारांनी वाद्यां वाजयत परेड काडली. उपरांत इंडोनेशियन लष्करी कर्मचार्यांचो एक पंगड कर्तव्य पथा वयल्यान मिरवणुकेंतल्यान गेलो. भारतीय जवानांनी भीष्म टँक, पिनाक मल्टी लॉंचर रॉकेट सिस्टीम सयत मिरवणुकेंत वांटो घेतलो.
हवाई दलाच्या फ्लायपास्टांत ४० विमानांनी भाग घेतलो. हातूंत २२ लढाऊ विमानां, ११ येरादारी विमानां आनी ७ हेलिकॉप्टरां वांटेकार जाल्लीं. ह्या फ्लाय पास्ट कार्यावळींत अपाचे, राफेल आनी हरक्यूलिस हीं विमानां आशिल्लीं. मिरवणुकेंत १५ राज्यां आनी १६ मंत्रालयांचे चित्ररथ दिसले. पयलेच खेपे ५ हजार कलाकारांनी कर्तव्य पथाचेर एकत्र सादरीकरण केलें.
गोंयच्या चित्ररथान सगल्यांचेंं लक्ष ओडून घेतलेंं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
