भांगरभूंय | प्रतिनिधी
नवी दिल्ली, खबरां संस्था: कांय दिसां आदीं जाल्ले दिल्ली वेंचणुकेंत आम आदमी पक्षाक भाजपाक हारयलो. निमाणें बुधवारा भारतीय जनता पक्षाचे बसकेंत रेखा गुप्ता हांच्या नांवाचेर म्होर मारली. उपरांत चवथे फावट दिल्लींत महिलाराज येतलें हें स्पश्ट जालें.
रेखा गुप्ता हांणी आयज दिल्लीची नवी मुख्यमंत्री म्हणून सोपूत घेतलो. रामलीला मैदानार हो सुवाळो जालो. रेखा गुप्ता हांची काल भाजपाच्या विधीमंडळ फुडारी पदार निवड केली. ती दिल्लीची चवथी बायल मुख्यमंत्री थारली.
रेखा गुप्ता पयलेच फावट विधानसभा वेंचणूक जिखल्या. ती शालीमार बाग मतदारसंघांतल्यान आमदार म्हणून वेंचून आयल्या. तांणी विधानसभा वेंचणुकेंत आम आदमी पक्षाची उमेदवार वंदना कुमारी हांकां २९ हजार ५९५ मतांनी हारयली. कोण मुख्यमंत्री जातलो हाचे कडेन सगळ्यांचे लक्ष आशिल्लें. प्रवेश वर्मा, वीरेंद्र सचदेव, अभय वर्मा, आशिष सूद, रवींद्र राज आनी पवन शर्मा हे मुख्यमंत्री पदाचे सर्तींत आशिल्ले. मात भाजपान दिल्ली एका बायल नेतृत्वा कडेन दिवपाचें थारायलें.
आयज दिल्लीक जाल्ल्या सोपूत सुवाळ्यांत प्रधानमंत्री नरेंद्र मोदी, केंद्रीय गृहमंत्री अमित शाहा हांचे सयत भाजपशासीत राज्याचे मुख्यमंत्री आनी एनडीएचे सगळे व्हड फुडारी हजर आशिल्ले. ह्या वेळार रेखा गुप्ता हांचे सयत स फुडार्यांनी मंत्रिपदाचो सोपूत घेतलो. रेखा गुप्ता हांचे सयत प्रवेश वर्मा, आशिष सूद, मनजिंदर सिंग सिरसा, कपिल मिश्रा, रवींद्र इंद्रराज आनी पंकज सिंग हांणी मंत्रिपदाचो सोपूत घेतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
