भांगरभूंय | प्रतिनिधी
अरविंद केजरीवाल हांच्या आप पक्षाक दणदणीत हारोवन भाजपान सुमार सत्तावीस वर्सां उपरांत दिल्लींत सत्ता स्थापन केली. दिल्लींत दोळे दिपकावपी जैत मेळयतनाच सगल्यांक एकूच प्रस्न पडलो आनी तो म्हणल्यार दिल्लीचे नवे मुख्यमंत्री कोण? ह्या प्रस्नाची जाप मेळपाक सुमार तेरा दीस लागले. कारण ह्या दिसांनी प्रधानमंत्री नरेंद्र मोदी फ्रान्स आनी अमेरिकेचे भोंवडेर आशिल्ले. प्रधानमंत्री फ्रान्स आनी अमेरिकेची भोंवडी सोंपोवन आयले उपरांत भाजपान दिल्लीच्या नव्या मुख्यमंत्र्याची घोशणा केली.
दिल्लीच्या नव्या मुख्यमंत्र्याची घोशणा करतना भाजप श्रेश्ठींनी परतून एकदां धक्को दिवपाचें तंत्र आपणावन सगल्यांकूच अजाप केलें. भाजपान मध्य प्रदेश आनी राजस्थानांत धक्को दिवन अनपेक्षीत अशे नवे चेरे मुखार हाडून तांकां कदेलार बसयले, त्याच तंत्राचो वापर करून भाजप श्रेश्ठींनी दिल्लीतूय अनपेक्षीत नवो चेरो मुखार हाडून तांकां मुख्यमंत्र्यांच्या कदेलार बसयले. तो नवो चेरो म्हणल्यार दिल्लीच्यो सद्याच्यो मुख्यमंत्री रेखा गुप्ता.
वास्तवीक वेंचणुकेचे आदीं आनी उपरांत रेखा गुप्ता ह्यो मुख्यमंत्रीपदाचे सर्तींत नाशिल्ल्यो. त्यो मुख्यमंत्री जातल्यो असो अदमास लेगीत कोणाक नाशिल्लो. कारण फाटल्या दोन विधानसभा वेंचणुकेंत तांकां हार खावची पडिल्ली. भाजप प्रवेश वर्मा हांकां मुख्यमंत्री करतले असो अदमास आशिल्लो. कारण प्रवेश वर्मा हे दिल्लीचे आदले मुख्यमंत्री सर्गेस्त साहबसिंग वर्मा हांचे पूत. ते आदले खासदार आसून दिल्लींतले प्रभावशाली फुडारी आसात. तशेंच तांणी अरविंद केजरीवाल हांकां हारयिल्ल्यान ते जायंट किलर थारल्यात. ते ज्या जाट समाजाचे आसात तांची संख्या दिल्लींत लक्षणीय आसा. पूण भाजप श्रेश्ठींच्या राष्ट्रीय स्वयंसेवक संघाच्या मनांत रेखा गुप्ता हांचें नांव आशिल्लें.
रेखा गुप्ता हांकां दिल्लीच्या मुख्यमंत्रीपदाच्या कदेलार बसोवपाक राष्ट्रीय स्वयंसेवक संघाचो मोटो वांटो आसा. संघाची पयली पसंती रेखा गुप्ता ह्योच आशिल्ल्यो. कारण रेखा गुप्ता ह्यो विद्यार्थी दशे सावन संघ परिवारा कडेन लागींच्यो आसात. अखील भारतीय विद्यार्थी परिशदेंतल्यान तांणी आपल्या भौशीक जिणेची सुरवात केली. संघान तांचेर ज्यो जापसालदारक्यो दिल्यो त्यो तांणी वेवस्थीत पार पाडल्यो. दुसरी म्हत्वाची गजाल ती एक बायलमनीस आसा. दिल्लींत फाटल्या कांय वर्सांत काँग्रेस आनी आपान बायलांक मुख्यमंत्रीपदाची संद दिली. काँग्रेसीच्यो शिला दीक्षित ह्याे सुमार पंदरा वर्सा दिल्लीच्यो मुख्यमंत्री आशिल्ल्यो. आपानूय केजरीवाल बंदखणींत गेले उपरांत आतिशी हे बायले कडेन मुख्यमंत्रीपदाचीं सुत्रां सोंपयलीं. इतलेंच न्हय जाल्यार भाजपानूय दिल्लींत सुषमा स्वराज हांचे कडेन मुख्यमंत्रीपदाची जापसालदारकी सोंपयिल्ली. ताका लागून भाजपान तीच परंपरा राखून रेखा गुप्ता हांच्या गळ्यांत मुख्यमंत्रीपदाची माळ घातली. रेखा गुप्ता ह्यो वैश्य समाजाच्यो आसात. केजरीवाल हेवूय वैश्य समाजाचे आसात. फाटल्या पंदरा वर्सां सावन दिल्लींत वैश्य समाज केजरीवाल हांचे फाटल्यान उबो आशिल्लो. रेखा गुप्ता हांकां मुख्यमंत्री करून भाजपान केजरीवाल हांचे कडेन गेल्लो वैश्य समाज परतून आपले वटेन ओडला.
रेखा गुप्ता हांकां मुख्यमंत्री करपा फाटल्यान आनीक एक कारण आसा. भाजपा आयज हो देशांतलो सगल्यांत मोटो पक्ष आसा. देशांतल्या 13 राज्यांनी आनी एका केंद्रशासीत प्रदेशांत भाजपाची सत्ता आसा. पूण खंयच्याच राज्यांत भाजपान एके बायलेक मुख्यमंत्रीपदाची संद दिली ना. वसुंधरा राजे ह्यो भाजपाच्यो निमाण्यो बायल मुख्यमंत्री आशिल्ल्यो. 2013 ते 2018 ह्या कालावधींत त्यो राजस्थानाच्यो मुख्यमंत्री आशिल्ल्यो. 2018 उपरांत खूबशा राज्यांनी भाजपाची सत्ता आयली, पूण खंयच्याच राज्यांत भाजपान बायलमनशेक मुख्यमंत्रीपदाची संद दिली ना. ताका लागून भाजपाचेर विरोधी पक्षां कडल्यान टिका जाताली. रेखा गुप्ता हांकां मुख्यमंत्री करून भाजपान ती टिका खोडून काडपाचो यत्न केला. तशें पळोवंक गेल्यार हाचे आदींय भाजपान चार बायलांक मुख्यमंत्रीपदाची संद दिल्या. सर्गेस्त सुषमा स्वराज हांकां दिल्ली, उमा भारती हांकां मध्य प्रदेश, वसुंधरा राजे हांकां राजस्थान जाल्यार आनंदीबेन पटेल हांकां गुजराताच्या मुख्यमंत्रीपदार बसयिल्ली. आतां रेखा गुप्ता ह्यो भाजपाच्यो पांचव्यो बायल मुख्यमंत्री जाल्यात. रेखा गुप्ता हांकां मुख्यमंत्री करून भाजपान एके तरेन दिल्लीत महिला राज हाडलां. आतां रेखा गुप्ता हांचेर व्हड जापसालदारकी आसा. वेंचणूक काळांत भाजपान दिल्लीकारांक दिल्लीं आस्वासनां पुराय करपाचें मोटें आव्हान तांचे मुखार आसा. भाजपान दिल्लींत बायलांक दर म्हयन्याक 2500 रुपया रोख दिवपाचें आस्वासन दिलां. ह्या आस्वासनाक भुल्लसून दिल्लींतल्या बायलांनी भाजपाक भरभरून मतां दिल्यांत. आतां बायलांक दर म्हयन्याक 2500 रुपया दितनाच दिल्लीची तिजोरी रिती जावची ना हाचीय काळजी तांकां घेवची पडटली. कारण तिजोरी रिती जाली जाल्यार ताचो परिणाम विकास कामांचेर जाता. ताका लागून दिल्लीकारांक दिल्लीं आस्वासनां पुराय करून विकास कामां करपाची सरये वयली कसरत तांकां करची पडटली.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
