भांगरभूंय | प्रतिनिधी
भारतीय प्रजासत्ताक काल, पयरूच 76 वर्सांचें जालें. 76 वो प्रजासत्ताक दीस देशान सामको उमेदीन मनयलो. बळिश्ट आनी गिरेस्त भारताची बुन्याद ज्या संविधानाच्या आदाराचेर जाली, त्याच संविधानाचेर आयज 75- 76 वर्सां उपरांतूय शिताडो उडयतात, हाचें वायट दिसप सभावीक आसा. देशाची राजधानी आशिल्ल्या दिल्लीच्या विधानसभा वेंचणुकांच्या निमतान आसूं वा संसदेच्या अधिवेशनांत दोनूय सभाघरांत जें घडटा तें आतां संसदीय समितींच्या बसकांनीय घडपाक लागलां, हें दुर्दैव म्हणचें पडटलें. दिल्ली विधानसभा वेंचणुकेचें मतदान फक्त आठ दिसांचेर आयलां. अशें आसतना सत्ते वयल्या आम आदमी पक्षाच्या वांगडा काँग्रेस आनी आतां भारतीय नेता पक्षानूय मतदारांची खरेदी करपाक जो नवो फंडा सुरू केला, तो पळयल्यार प्रवास नेमको खंयचे दिकेन चल्ला हें कळना आनी ताचें कोणाकूय कांयच पडून गेलां, अशें दिसपाचीय परिस्थिती ना. फुकट रेवड्यांचें वांटप करतना कसलोच धरबंद उरिल्लो दिसना आनी मतदारांक विकत घेवपाचें हें राजकारण अजून खंय मेरेन पावपाक शकता हाचो कोणाकूच अदमासूय करपाक येवचोना, अशे पद्दतीन सगलें कितें घडटना दिसता.
भारतीय जनता पक्षान तर तीन पांवड्यार आपलो संकल्पनामो जाहीर करीत एक नवोच विक्रम केला. होच प्रकार आतां बिहार वा हेर राज्यांच्या विधानसभा वेंचणुकांच्या वेळार दिसलो वा हेर पक्षूय त्याच पावलांचेर चलून आपापले वेंचणूक जाहीरनामे तीन वा चार पांवड्यांनी मतदारां मुखार दवरले जाल्यार ताचें कोणाक अजाप दिसपाचें कारण ना.
दिल्ली विधानसभा वेंचणुकेच्या काळांत जें कितें आमच्या देशाचे राजधानींत चल्लां ताचेर नदर मारल्यार भारतीय प्रजासत्ताकाचीं 76 वर्सां पुराय करतना आमी संविधाना सावन पयस खंयतरी भरकटत वचपाक लागल्यात काय, अशें दिसपाक लागता. भारतीय संविधान जांणी बरयलें तांणी केन्ना विचारुय केल्लो नासतलो की वेंचणुको जिखपाक आनी खंयच्याय मार्गान सत्तेर येवपाक मतदारांची खरेदीच राजकी पक्ष वा तांचे फुडारी करतले. पूण दिल्लींत जें घडटा तें पळोवन मतांची ठोक खरेदीच करप चालू आसा, अशेंच कांयशें चित्र दोळ्यां मुखार येता. दिल्ली विधानसभा वेंचणुकेचो प्रचार हो प्रचार कमी आनी मतांचे खरेदी खातीर व्यवहार चड दिसता. खंयच्याच एका पक्षाक हातूंत दोश दिवपाक मेळचो ना, तर भाजपा सयत सगलेच पक्ष चडांत चड मतदार कशे विकत घेवपाक मेळटले हाचेर चड भर दित आसात. मतदारांक भुलोवपी दरेका पक्षाच्यो येवजण्यांची वळेरी सांगपाची जाल्यार ताचेरुच ह्या लेखाचो सगलो जागो वगडावचो पडटलो. ताका लागून विविध पक्षांनी जाहीर केल्ल्या उदरगत आनी कल्याण येवजण्यां कडेन आमकां थोडी आडनदर करची पडटा तरी मतदारांक मळबांतलो चंद्रीम हाडून दिवपाचें तितलें आस्वासन ह्या पक्षांनी दिवपाचें दवरलां अशें म्हणपाक मेळटलें. जाहीर प्रचार सोंपपाक अजून चार- पांच दीस उरिल्ल्यान तोय हाडून दिवं अशें आस्वासन कोण दिवूंय शकता. मुफत रेवड्यांचें वांटप कमी चड प्रमाणांत वेंचणूक काळांत जातालें, पूण आतां ती मर्यादाय हुपिल्ल्याचें चित्र दिल्लींत दिसता.
मध्यप्रदेश आनी महाराष्ट्रांत बायलांनी सरकार करपाक भाजपाक हात दिलो, आतां बायलांक भुलोवपाक नेटाची सर्त दिल्लींत राजकी पक्षांमदीं चल्ल्या आनी निधी वांटपा खातीर एकमेकांच्या नाकाक दावो हात कसो लावपाक मेळटलो हेंच प्रत्येकजण पळयत आसा. काँग्रेस पक्षान बोली अडेज हजारां मेरेन वाडयतकच भाजपा थोडोच फाटल्यान रावतलो? तांणीय एका फाटल्यान एक येवजण्यो अश्यो कितें जाहीर केल्यो की दिल्लींतल्या मतदारांक आतां ‘जाऊँ तो कहाँ जाऊँ’ अशेंच जालां. दिल्लींत मतदारांक वीज, उदक, शिक्षण, वैजकी उपचार हे तर मुफत आशिल्लेच, आतां तातूंत अशी भर पडल्या की मागचें तर कितें मागचें हेंच मतदारांक कळना जालां. काँग्रेसीचो तर सध्या इतलो गोंदळ जाला की आपूण नेमकें कितें करता आनी ताचे परिणाम कितें जातलें, हाचीय तांकां कल्पना आयिल्ली दिसना. मुफत रेवड्यांची सर्त जिखप तर तांचे ताकीभायले. मतदारांचो विस्वास काँग्रेसीन पुराय वगडायला. ताका लागून दुसरें पावल म्हूण संविधानाचेर भाजपाचो हल्लो जाता, तांकां तें बदलपाचं आसा, महात्मा गांधींचो अपमान करतात ही लोकसभा वेंचणुकेंत व्हड प्रमाणांत वापरून झरयिल्ली रेकाॅर्डूच वाजोवपाचेर काँग्रेसीन भर दिल्लो दिसता आनी अर्थांतूच तांची विचारशुन्यताय तातूंत स्पश्टपणान जाणवता. संविधान संकश्टांत ही काँग्रेसीची घोशणा तांकां आतां साथ दितले वा ताचो राजकी लाव तांकां मेळटलो हाची मात पसून शक्यता दिसना, पूण राहुल गांधी आनी तांचे हेर फुडारी मात अजून संविधानाची प्रत हड्ड्या कडेन घेवन भोंवतना दिसतात.
समाजीक न्याय मेळोवन दिवपाच्या धोंगा खाला जातीय जनगणना करपाचे मागणेचेरुय काँग्रेसीचो नेट दिसता पूण ताचो धपको काँग्रेस पक्षाकूच बसुंये हाची तांकां मात्तूय कल्पना ना. हे मागणे फाटलो नेमको उद्देश कितें, हाची जाप आयज काँग्रेसी कडेन ना, ही वस्तुस्थिती. समाजांत फूट घालप, जातीय दुस्मानकाय वाडोवप हो तांचो हेतू आसा जाल्यार तांकां ताचो राजकी लाव कसो मेळटलो हें गणीत समजुपा सारकें ना. भारतीय प्रजासत्ताक 76 वर्सांचें जातना काँग्रेसी सारको पोरणो पक्ष काळखांत सांसपडटा अशी तांची ही स्थिती आसा. आपूण नेमके खंय भरकटत वचपाक लागलां, ताची जाप तांकां सोदपाची आसा जाल्यार पयरुच वक्फ बोर्डा संबंदीच्या संयुक्त संसदीय समितीचे बसकेंत जें कितें घडलां तातूंतल्यान मेळपाक शकता. संसदेच्या दोनूय सभाघरांत सध्या कामकाज कमी आनी गोंदळूच चड अशी परिस्थिती आसतना संसदीय समितींच्या बसकांनी निदान वेगळी स्थिती आसप अपेक्षीत आशिल्लें, पूण थंयूय तेंच चित्र दिसचें हाचे सारकें दुर्दैव ना. संसदेची प्रतिश्ठा सांबाळपाक सत्तारुढ पक्ष आनी विरोधक उणे पडपाक लागल्यात हें वास्तव न्हयकारपाक जावचें ना, अशा वेळार संसदीय समितींचेर व्हडली जापसालदारकी येता, पूण आतां थंयूय उणें- चड प्रमाणांत तें चालू आसा, हें जायते फावटीं दिसून आयलें. लोकसभा, राज्यसभेंत जें घडटा तेंच संसदीय समितींच्या बसकांनी जावपाक लागलें तर आमी संविधाना सावन पयस खंय तरी भरकटत आसात, अशेंच म्हणचें पडटलें. 10 वांगड्यांत निलंबीत करपाचो वेळ समितीच्या अध्यक्षाचेर येवचो हातूंतच खूब कितें कळटा. सरकार आनी विरोधक ज्या वेळार समन्वयान काम करतले, तो बरो दीस थारतलो, इतलेंच आमकां म्हणपाक मेळटलें.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
