भांगरभूंय | प्रतिनिधी
नवी दिल्ली, खबरां संस्था ः दिल्लींत सायबर गुन्यांवानी वाड जायत आसा. दिल्ली सायबर क्रायम सेलाचे डीसीपी हेमंत तिवारी हांणी सायबर गुन्यांव संबंदीत डेटा जाहीर केला. दिल्लींत दर दिसा सुमार 700 लोकांची सायबर फटवणूक जाता. हो फकत दिल्लीचो डेटा. देशांतली परिस्थिती आनीक वायट आसा अशें ते सांगता.
दर दिसा सायबर गुन्यांवाचे कागाळीचे 1700 कॉल येतात. तातूंतले 700-800 कॉल नवे आसात. फाटल्या 18 म्हयन्यांत सायबर गुन्यांवाची समस्या खूब प्रमाणांत वाडल्या. दिल्ली पुलिसांच्या सायबर हेल्पलायन क्रमांक 1930 चेर दर म्हयन्याक सरासरी 55 हजार ते 60 हजार कॉल्स येतात. चडशे कॉल्स अर्थीक आनी हेर फटवणूक संबंदीत आसतात. दिसाक 700-800 सायबर गुन्यांव कॉलांतले 200-250 फटवणूकीचे कॉल्स आसतात अशें डीसीपी तिवारी हांणी सांगलें.
पीटीआयक दिल्ले मुलाखतींत डीसीपीन सांगलें, चड करून लोकांच्या हांयसाक लागून तांची फटवणूक जाता. हाचे भायर सेक्सटॉर्शन, डिजिटल अॅरेस्ट, मॅट्रिमोनियल वेबसायट आनी वर्क फ्राम होम नांवान कॉल्स येतात. सायबर गुन्यांवकार लोकांक ईमेल धाडटात. चाइल्ड पोर्नोग्राफी वेबसाइट स्कॅन करतना तुमी मेळ्ळां अशें सांगून लोकांक भियेयतात आनी तांची फटवणूक करतात.
हेल्पलायन क्रमांक 1930
ऑनलायन फटवणूक जाल्ल्या मनशान बेगीनांत बेगीन आरबीआय हेल्पलायन 1930 क्रमांकाचेर फोन करचो. हाका लागून तांचे पयशे परत मेळपाची शक्यताय वाडटा. कारण फटवणूक केल्या उपरांत 24 वरां भितर वेव्हार ब्लॉक करुंक मेळटात. 1930 कडेन फोन लागना जाल्यार आपत्कालीन क्रमांक 112 चेर फोन करचो, थंयच्यान फोन 1930 हेल्पलायनीचेर हस्तांतरीत जातलो. दोनूय पर्याय उपलब्ध नासल्यार फटवल्ल्या मनशान बेगोबेग लागींच्या पुलीस स्टेशना कडेन संपर्क करचो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
