भांगरभूंय | प्रतिनिधी
भांगरभूंय । प्रतिनिधी
म्हापशेंः हणजूण हांगच्या एका हॉटेलांत मारपेटीचें जें प्रकरण घडलें तें दिल्लींतल्या पर्यटकांचे गैरवर्तुणेक लागून घडलें. सीसीटीव्ही फुटेजांतल्यान हें स्पश्ट जाता. ताका लागून अटक केल्ल्या थळाव्या लोकांचो सहानुभूतीन विचार करचो आनी दोनूय वटेन विचार करून फुडली कारवाय करची अशी मागणी शिवोलेची आमदार डिलायला लोबो हिणे पुलीस अधिक्षक निधी वाल्सन हांचे कडेन केल्या.
फाटल्या 5 मार्चाक ही मारपेट जाल्ली. अॅड आश्विनीकुमार शर्मा हाचे कागाळे वयल्यान 6 मार्चाक हणजूण पुलिसांनी मारपेटीचो गुन्यांव नोंद केल्लो. मात शर्मा आनी तांगेल्या कुटूंबान दिल्ली वचून घडणुकेचो व्हिडिओ समाज माध्यमांचेर घालून पुलिसांचेर आरोप केल्लो. ते उपरांत तांणी खूनी हल्लो केल्ल्याचो गुन्यांव नोंद करून थळाव्या पांच जाणांक अटक केल्या. बिरेस्ताराक सांजे डिलायला लोबोन हणजूण- कांयसूवचो सरपंच लक्ष्मीदार चिमुलकार आनी थळाव्या लोकां सयत पर्वरी हांगा वाल्सन हांची भेट घेवंन ताका घडिल्लो प्रकार सांगलो.
हॉटेलांतल्या सीसीटीव्ही फुटेजींत हॉटेल कर्मचार रॉयस्टन डायस हाचे कडेन दिल्लीतले पर्यटक हुज्जत घातलात अशें दिसता. ताणे तांका हुक्को ओडपाक मनाय केल्ली. डायसाक तांणी मारपेट केली. वाद नाका म्हणून हॉटेल वेवस्थापनान डायसाक घरा धाडल्लो. तो मोबायल चार्जर व्हरपाक आयलो तेन्ना तेन्ना पर्यटकांनी ताका मरत मारपेट केली. ताका लागून दोन गटांत मारपेट जावपाचो प्रकार जालो.
पर्यटकांचेर थळाव्यांनी हल्लो केलो ना. पर्यटकांनीच कायदो हातांत घेतलो. ताका लागून अटक केल्ल्या पांच जाणाचेंर सहानुभूती दाखोवन कारवाय करची अशें लोबोन मागलां. संबंदीत पुलीस स्टेशनांतल्यान अहवाल मागोवन विचार करतले अशें वाल्सन हांणे पत्रकारांक सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
