दिलचल नगराध्यक्षा आडचो अविस्वास शेळेतलो

भांगरभूंय | प्रतिनिधी

मुख्यमंत्रीः सगळे नगरसेवक रावतले गैरहाजीर; प्रदेशाध्यक्षा सयत शिश्टाय

भांगरभूंय । प्रतिनिधी

दिवचलः दिवचलचे नगराध्यक्ष कुंदन फळारी हांचे आड 9 नगरसेवकांनी दाखल केल्ल्या अविस्वास थारावा वयलें नाटक शेनवारा मुख्यमंत्री डॉ. प्रमोद सावंत तशेंच प्रदेशाध्यक्ष सदानंद शेट तानावडे आनी आमदार डॉ. चंद्रकांत शेट्ये हांणी केल्ले शिश्टायेक लागून सोंपलें. पालिका मंडळाचे बसकेंत सगळ्या नगरसेवकांचे हाजिरेंत ह्या विशयाचेर चर्चा जाली आनी नाटकाचेर पड्डो पडलो. बसके उपरांत पत्रकारां कडेन उलयतना मुख्यमंत्री डॉ. सावंत हांणी सांगलें, हो अविस्वास थाराव शेळेतलो. 17 डिसेंबराक जावपी चर्चेंत एकूय नगरसेवक वांटो घेवचो ना. ते उपरांत परतून बसका घेवन आनी सगळ्यांक विस्वासांत घेवन फुडली भुमिका आनी रणनिती थारायतले, अशें तांणी पत्रकारांक सांगलें.

कांय दिसां आदीं भाजपाचे 7 आनी हेर 2 नगरसेवकांनी नगराध्यक्ष कुंदन फळारी हाचे आड अविस्वास थाराव दाखल केल्लो. मात तो दाखल करतना मंडळ आनी पक्षाक विस्वासांत घेवंक नाशिल्ल्यान ते संबंदांत नाराजी निर्माण जाली. स्वता मुख्यमंत्र्यान हे संबंदांत नाराजी उक्तायले उपरांत मुख्यमंत्र्यांचे हाजिरेंत शेनवारा हे संबंदांत विशेश बसका आपयली. बंद दारा आड जाल्ले हे बसकेक सगळे 14 नगरसेवक हाजीर आशिल्ले.

बसकेंत सगळ्या नगरसेवकांनी आपापली भुमिका मुख्यमंत्री आनी प्रदेशाध्यक्षां मुखार मांडली. नगरसेवकांचें म्हणणें मुख्यमंत्री, प्रदेशाध्यक्ष आनी आमदारान समजून घेतलें. तांचे जे कांय प्रस्न आसात ते सोडोवपा संबंदांत सकारात्मक चर्चा जाल्ल्याचें सांगलें.

अविस्वास थाराव फाटीं घेवचे खातीर 17 डिसेंबराक निश्चीत केल्ल्या अविस्वास थारावाचे चर्चे वेळार एकूय नगरसेवकान हाजीर रावचें न्हय, अशें ह्या वेळार मुख्यमंत्र्यान सुचयलें. ताका लागून हो अस्विस्वास थाराव शेळेतलो, हें स्पश्ट जालां.

आपली प्रतिक्रिया उक्तायतना नगराध्यक्ष फळारी हांणी सांगलें, पक्ष जो निर्णय घेतलो तो आपल्याक मान्य आसतलो. अविस्वास थाराव शेळेतलो हें आतां निश्चीत जालां. ते उपरांत पक्ष आपल्याक जी सांगतलो ती भुमिका घेवपाक आपूण तयार आसा.

भाजपाचे नगरसेवक अनिकेत चोडणकार हांणी सांगलें, आमी जी भुमिका घेतल्या ती योग्य पद्दतीचो वापर करिनासना घेतिल्ल्यान निश्चितूच पक्षां मदीं कांय प्रमाणांत नाराजी निर्माण जाली. भारतीय जनता पक्ष हो सगळ्यांत वांगडा घेवन वचपी पक्ष. ते खातीर कांय गजाली खोलायेन विचार करपाच्यो आसतात. ते खातीर भुमिका चुकली, मात आतां सगळे नगरसेवक संघटीत आसात. पक्षश्रेश्ठी जो निर्णय दितले तो आमकां मान्य आसतलो.

मजगतीं, 14 नगरसेवकां वांगडा मुख्यमंत्र्यान बसका घेतना तांच्यो वेगवेगळ्यो सुचोवण्यो आनी प्रस्ताव समजून घेतले.

गैरसमज, घुस्पागोंदळ सोडयलाः तानावडे

भारतीय पक्षाची एक शिस्त आसा. ते शिस्तीक पाळो दिवन आयज (शेनवारा) एक विशेश बसका घेतली. तातूंत जे कांय गैरसमज आनी घुस्पागोंदळ आशिल्लो तो मुख्यमंत्री डॉ. प्रमोद सावंत आनी आमदार डॉ. चंद्रकांत शेट्ये हांचे हाजिरेंत सोडयलो. हे मुखार कसलेच तरेचो मनांत दुबाव आसचो ना. पक्ष जी भुमिका घेतलो ती सगळ्या नगरसेवकांक मान्य आसतली, अशें प्रदेशाध्यक्ष सदानंद शेट तानावडे हांणी सांगलें.