‘दितवाह’ चक्रीवादळ भारताचे दिशेन

भांगरभूंय | प्रतिनिधी

श्रीलंकेंत 123 परस अदीक जाणांक मरण

खबरां संस्था

चेन्नय : श्रीलंकेंत विध्वंस केले उपरांत ‘दितवाह’ चक्रीवादळ भारताचे दिशेन गतीन येता. तामीळनाडू, आंध्रप्रदेश आनी पुद्दुचरीच्या दर्यादेग वाठारांत नेटाच्या वाऱ्या सयत उटंगाराचो पावस पडपाक लागला. शेनवारा सांजे मेरेन हें वादळ आनीक खर जावपाची शक्यताय आसा.

तामीळनाडूंत उटंगाराच्या पावसाक लागून चेन्नयच्या 54 विमानांचीं उड्डाणां रद्द केल्यांत. पद्दुचेरी सेंट्रल युनिव्हर्सिटीन चक्रीवादळाक लागून शेनवारा सुटी जाहीर करून सगल्यो परिक्षा फुडें धुकल्ल्यात. पुद्दुचेरी, करायकल, माहे आनी यनमांतल्यो सगल्यो शाळा आनी म्हाविद्यालयां सोमार मेरेन बंद आसतलीं.

श्रीलंकेंत ‘दितवाह’ चक्रीवादळाक लागून आयिल्ल्या हुंवारांत आनी पालसणां कोसळिल्ल्यान 123 परस अदीक लोकांक मरण आयलां. 130 परस अदीक लोक बेपत्ता आसात. चेन्नयच्या विमानांचीं उड्डाणां रद्द जाल्ल्यान कोलंबो विमानतळाचेर सुमार 300 भारतीय प्रवासी फाटल्या तीन दिसां सावन आडकल्यात. हे सगले दुबय सावन श्रीलंका मार्गान भारतांत येवपाचे आशिल्ले. ‘दितवाह’ चक्रीवादळाचे फाटभुंयेर तामीळनाडूंतल्या विलुप्पुरम, चेंगलपट्टू, तिरुवल्लूर, नागुपट्टीनम, तिरुवरूर, तंजावर, पुदुकोट्टई आनी मयिलादुथुराई हांचे सयत संवेदनशील दर्यादेगे वयल्या जिल्ह्यांनी राष्ट्रीय आपत्ती प्रतिसाद दळाचे 14 पंगड तैनात केल्यात. महाराष्ट्रांतल्या पुणे आनी गुजरातांतल्या वडोदराच्या एनडीआरएफ तळा वयल्यान 10 पंगड चेन्नय वचपाक भायर सरल्यात.

पुद्दुचेरी दर्यादेगेक आयज आपट्टलें ‘दितवाह’

‘दितवाह’ चक्रीवादळ 30 नोव्हेंबराक तामीळनाडू- पुद्दुचेरीच्या दर्यादेगेर आपट्टलें. हे खातीर पुराय राज्यांत पावस पडटलो. तामीळनाडू, आंध्र प्रदेश आनी पुद्दुचेरींत हुंवार येवपाक शकता. दोंगराळ वाठारांत पालसणां कोसळपाची भिरांत आसा. ह्या वाठारांत अचकीत हुंवार येवपाक शकता. भारतीय हवामानशास्त्र विभागान (आयएमएस) हांणी ही म्हायती दिल्या.