भांगरभूंय | प्रतिनिधी
-अालेक्स सिक्वेरा हांणी दिलो मंत्रीपदाचो राजीनामो
-रमेश तवडकार आयज सोडटले सभापतीपद
– राजभवनाचेर 12 वराचेर सोपूतविधी
– सोपुतविधी उपरांत मोठे खातेबदलपणजी :कायदो मंत्री अालेक्स सिक्वेरा हांच्या राजिनाम्या उपरांत मडगांवचे आमदार दिगंबर कामत आनी रमेश तवडकार हे आयज मंत्रिपदाचो सोपूत घेतले. राजभवनाच्या दरबार हॉलात दनपारा 12 वरांचेर राज्यपाल पुसापती अशोक गजपती राजू हे तांकां मंत्रीपदाचो सोपूत दितले. हाचे पयलीं रमेश तवडकार हे सभापतीपदाचो राजिनामो दितले. सोपूतविधी उपरांत दोन दिसांत मंत्र्यांच्या खात्यांत व्हड बदल जातले.
गोंयांत फाटले बरेच दीस मंत्रीमंडळ फेरबदलाची चर्चा सुरू आसा. मुख्यमंत्री डॉ. प्रमोद सावंत हे दिल्लींत आसतना नव्या मंत्र्यांचो सोपूतविधी निश्चीत जालो. रमेश तवडकार आनी दिगंबर कामत हांचो आयज मंत्री म्हूण सोपूतविधी जातलो, अशी म्हायती मुख्यमंत्र्यांनी दिल्ली सावन गोंयांत आयले उपरांत दिली. फाटल्या दोन म्हयन्यात मुख्यमंत्र्यांच्यो बऱ्योच दिल्ली भेटी जाल्यो. अधिवेशना उपरांंत तांणी दिल्लींत पक्षाचे राष्ट्रीय अध्यक्ष जे. पी. नड्डा आनी केंंद्रीय गृहमंत्री अमीत शाह हांची भेट घेतिल्ली. हे भेटीत मंत्रीमंंडळ फेरबदलाचेर चर्चा जाल्ली. आतां चवथी पयली सरकारात दोन नव्या मंत्र्यांचो आस्पाव जाता.
मार्च 2022 वर्सा विधानसभा वेंचणूक जावन डॉ. प्रमोद सावंत हे परतून मुख्यमंत्री जाले. हाचे उपरांत निलेश काब्राल हांचे जाग्यार काँग्रेसींतल्यान भाजपांत आयिल्ले अालेक्स सिक्वेरा हांचो मंत्रीमंडळांत आस्पाव जालो. आतां रमेश तवडकार आनी दिगंबर कामत हांचो मंत्रीमंडळांत आस्पाव जाता. काय दिसांं पयली गोविंद गावडे हांची मंत्रिमंडळातल्यान हकालपट्टी जाली. हाका लागून एक जागो खाली जाल्लो. ते दिसा सावन रमेश तवडकार हांकां मंत्रीपद मेळपाची चर्चा सुरू आसली. बुधवारा अालेक्स सिक्वेरा हांणी राजिनामो दिले उपरांत मंत्रीमंडळांत दोन जागे खाली जालें. हे जागे आयज भरतले.
————————
व्यक्तीगत कारणा खातीर दिलो राजिनामो : अालेक्स सिक्वेरा
भलायकेच्या कारणाक लागून न्हय जाल्यार व्यक्तीगत कारणाक लागून हांव मंत्रीपदाचो राजिनामो दिता. म्हजो राजिनामो हांंवे मुख्यमंत्री डॉ. प्रमोद सावंत हांकां धाडला, अशें अालेक्स सिक्वेरा हांंणी बुधवारा सांंगलें.
कायदो मंत्री अालेक्स सिक्वेरा हांची भलायकी बरी ना. अधिवेशना पयली दिल्लींतल्या हॉस्पिटलांत उपचारा खातीर ते दाखल जाल्ले. अधिवेशनांत लेगीत बरेच दीस ते गैरहाजीर आशिल्ले. तांच्या राजिनाम्याची चर्चा राजकी मळार सुरू आशिल्ली.
…………
पक्षा खातीर सभापतीपद सोडून मंत्रीपदाचो स्वीकार : रमेश तवडकार
भारतीय जनता पक्षांत पक्षा परस खंयचीच व्यक्ती व्हड नासता. पक्षाच्या आदेशाक पाळो दिवचोच पडटा. आयज मेरेन पक्ष दिता त्यो जापसालदाऱ्यो हांवे पुराय केल्या. संघटणे खातीर हांवे मंत्री जावप पक्षाक योग्य दिसले म्हूण हांव मंत्रीपदाचो स्विकार करता. सभापती म्हूण हांंव खोशी आशिल्लो. सभापतीपदाक न्याय दिवपा सयत पदाची प्रतिश्ठा उच दवरपाचो हांवे यत्न केलो. आयज हांव सभापतीपदाचो राजिनामो दितलो, अशें रमेश तवडकार हांणी पत्रकार परिशदेंत सांंगलें.
———————-
………..मंत्रीपदाचे संकेत पयलीच मुख्यमंत्र्यान दिल्ले : दिगंबर कामत
म्हाका मंत्रीपद मेळटले हाचे संकेत मुख्यमंत्री डॉ. प्रमोद सावंत हांणी म्हाका पयलीच दिल्ले. राती आनी सकाळी हे विशी मुख्यमंत्र्यां कडेन चर्चा जाल्या, अशें दिगंबर कामत हांणी सांगलें.
………..
मायकल, संकल्पाक संद ना
मंत्रीपदा विशीं मायकल लोबो, डिलायला लोबो आनी संकल्प आमोणकार हांच्या नांवाची चर्चा आशिल्ली. मात खाली जाल्या दोन जाग्यांचेर दोन मंत्री आयज सोपूत घेतात. मंत्र्यांची आनीक सुवात नाशिल्ल्यान सध्या तरी मायकल लोबो, संकल्प आमोणकार वा डिलायला लोबो हांकां मंत्रीपद मेळपाची शक्यताय ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
