भांगरभूंय | प्रतिनिधी
राज्यपालान दिलो सोपूत
मंत्रीमंडळांत दुसरे खेपे बदल
खात्यांची घोशणा बेगिनूच
भांगरभूंय । प्रतिनिधी
पणजी : दिगंबर कामत आनी रमेश तवडकार हांणी मंत्रीपदाचो सोपूत घेतिल्ल्यान गोंयांतल्या डॉ. प्रमोद सावंत हांच्या फुडारपणाखालच्या मंत्रीमंडळात दुसरे खेपे बदल जाला. मार्च 2022 त डॉ. प्रमोद सावंत हांचें सरकार सत्तेर आयले उपरांत दोन वर्सां पयलीं निलेश काब्राल हांच्या जाग्यार आलेक्स सिक्वेरा हांचो मंत्रीमंडळांत आस्पाव जाल्लो. आतां गोविंद गावडे आनी आलेक्स सिक्वेरा हांचे जाग्यार रमेश तवडकार आनी दिगंबर कामत हांचो आस्पाव जाला. सोपूत विधी सुवाळ्याक लागून खूब दीस चालू आशिल्ल्या मंत्रीमंडळ फेरबदलाच्या चर्चेक पूर्णविराम मेळ्ळा. आतां खाते बदला विशीं सगल्यांक उमळशीक आसा.
सभापतीपदाचो राजिनामो दिले उपरांत काणकोणचे आमदार रमेश तवडकार आनी मडगांवचे आमदार दिगंबर कामत हांचो मंत्रीमंडळांत आस्पाव जालो. बिरेस्तारा राजभवनांत राज्यपाल पी. अशोक गजपती राजू हांणी दोगांकूय मंत्रीपद आनी गोपनीयतेचो सोपूत दिलो. ह्या वेळार मुख्यमंत्री डॉ. सावंत आनी हेर मानेस्त हाजीर आशिल्ले. सध्या आमदार तवडकार आनी आमदार कामत हांचो मंत्रीमंडळांत आस्पाव जाला. हाचे फुडेंय आनीक कोणाकूय संद मेळपाक शकता, अशें म्हणीत डॉ. सावंत हांणी परत मंत्रीमंडळ बदल जावपाक शकतात, अशे संकेत काल सकाळींच दिल्यात.
बिरेस्तारा जाल्लो सोपूत विधी हो राजकी फेरबदलाचो भाग म्हणून 2027 चे विधानसभा वेंचणुकेचे फाटभुंयेर जाल्ल्याचें मानतात. मजगतीं, नव्या मंत्र्यांक खंयचें खातें मेळटलें हाचीय घोशणा बेगीनूच जावपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
