भांगरभूंय | प्रतिनिधी
भांगरभूंय । प्रतिनिधी
म्हापशे्ंः लुईस बर्जर लांच प्रकरणातलो एक दुबावीत आदलो मुख्यमंत्री दिगंबर कामत हांका वर्ल्ड कप फुटबॉल सर्तींतली मॅचआ पळोवपाक कताराक तशेंच जांवय आनी चलेक मेळपाक युकेंत वचपाक म्हापश्यांतल्या अतिरिक्त जिल्हो आनी सत्र न्यायालयान मान्यताय दिवंन ताचो पासपोर्ट ताचे सुवादीन केला. पासपोर्ट दिवचो हे खातीर ताणे न्यायालयांत अर्ज केल्लो.
आपलो जांवय,चली आनी नातरां युकेंत रावतात. ताकां मेळपा खातीर कामत हांणी 18 दिसांचे पर्यटन व्हिसाचेर थंय वचपाचें थारायलां. 23 मार्च 2023 दिसा आमी युकेंत वतलीं. तशेंच ऑगस्ट म्हयन्यात पासपोर्टाचें नूतनीकरण करपाक जाय तेन्ना तो आपल्याक मेळचो अशें तांणी न्यायालयांत केल्ल्या अर्जांत नमूद केलां. 28 नोव्हेंबरा पोर्तुगाल आनी उरुग्वे हांचे मदीं कतारात जावपी वर्ल्ड कप फुटबॉल मॅच पळोवपा खातीर तांका 26 नोव्हेंबराक वचपाचें आसा. व्हिसा आनी तिकेट निश्चीत करपा खातीर पासपोर्ट लागतलो अशें तांणी न्यायालयाक सांगल्लें.
न्यायालयान तांका तात्पुरतो पासपोर्ट दिवपाक मान्यताय दिल्या. 29 नोव्हेंबराक गोंयांत परत आयल्या उपरांत 72 वऱां भितर पासपोर्टाचें नूतनीकरण करचे आनी ते उपरांत 72 वरांत भिरत युकेंत वचपा खातीर व्हिसा खातीर अर्ज करचो. 15 फेब्रुवारी 2023 मेरेन व्हिसा मेळो ना जाल्यार 16 फेब्रुवारीक पासपोर्ट न्यायालयांत जमा करचो. तशेंच व्हिसा, विमान तिकीट आनी पासपोर्ट नूतनीकरणाची फोटो प्रत न्यायालयाक सादर करपाक कामत हाका सांगलां.
लुईस बर्जन प्रकरणात 19 ऑगस्ट 2015 दिसा अटकपूर्व जामीन मंजूर केल्लो तेन्ना दिगंबर कामत हाचो पासपोर्ट न्यायालयान जमा करपाक सांगिल्लें. 2017 तशेंच 2018 वर्सा तांकां विदेशांत वचपा खातीर पासपोर्ट दिल्लो. लुईस बर्जर लांच प्रकरणाची सुनावणी अतिरिक्त जिल्हो आनी सत्र न्यायाधीश क्षमा जोशी हाचें सामकार सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
