भांगरभूंय | प्रतिनिधी
भाजप अध्यक्ष जे. पी. नड्डा हांचीय घेतली भेट
गोंयांत मात हे भेटी संबंदी चर्चांक ओतो
मडगांव: भौशीक बांदकाम मंत्री दिगंबर कामत हांणी दिल्लीक वचून केंद्रीय रस्तो येरादारी मंत्री नितीन गडकरी, केंद्रीय रेल्वे मंत्री अश्विनी वैष्णव, केंद्रीय शेतकी मंत्री शिवराज चौहान हांचे सयत भाजप अध्यक्ष आनी केंद्रीय मंत्री जे. पी. नड्डा हांची भेट घेतली. गोंयच्या विकासाकामां विशीं ह्यो भेटी आशिल्ल्याचें मंत्री कामत हांणी सांगलें.
मंत्री दिगंबर कामत हांची दिल्ली भेट सद्या गोंयांत चर्चेचो विशय आसा. मंत्री कामत हांणी डिसेंबर म्हयन्याच्या पयल्या सप्तकांत प्रधानमंत्री नरेंद्र मोदी हांची कुटुंबां सयत भेट घेतिल्ली. हे भेटी उपरांत कामत हांणी ही दिल्ली भोंवडी वैयक्तीक आशिल्ली आनी प्रधानमंत्री नरेंद्र मोदी हांचे कडेन कुटुंबीक भेट घेतिल्ल्याचें तांणी स्पश्ट केल्लें.
आतां मंत्री कामत हे भौशीक बांदकाम खात्याचे प्रधान सचीव आनी हेर अधिकारी हांचे सयत कॅप्टन ऑफ पोर्टाच्या वरिश्ठ अधिकाऱ्यां सयत दिल्लीक गेल्यात.
हे भोंवडेंत मंत्री कामत हांणी केंद्रीय रस्तो येरादारी आनी म्हामार्ग मंत्री नितीन गडकरी, केंद्रीय रेल्वे मंत्री अश्विनी वैष्णव हांची मंगळरा भेट घेतली. जाल्यार केंद्रीय शेतकी मंत्री शिवराजसिंह चौहान हांचे सयत भारतीय जनता पक्षाचे अध्यक्ष जे. पी. नड्डा हांचीय भेट घेतली. ह्या वेळार कामत हांचे पूत योगिराज कामत हे लेगीत हाजीर आशिल्ले.
मंत्री कामत हांचे दिल्ली भोंवडेक लागून गोंयांत मात चर्चांक ओतो आयला. पूण मंत्री कामत हांणी ही भोंवडी भौशीक बांदकाम खातें आनी कॅप्टन ऑफ पोर्टाच्या अधिकाऱ्यां सयत गोंयच्या विकासकामां विशीं आसा. विवीध केंद्रीय मंत्र्यांच्यो भेटी घेवन गोंयच्या विकासकामांची प्रगती आनी तांचे खातीर गरजेच्या सहकार्याचेर चर्चा केल्ल्याचें तांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
