दिगंबर कामत हांच्या मंत्रिमंडळांत आशिल्ले चडशे मंत्री डॉ. सावंत सरकारांत!

भांगरभूंय | प्रतिनिधी

पणजी : दिगंबर कामत 2007 ते 2012 ह्या काळांत गोंयचे मुख्यमंत्री आशिल्ले. तेन्ना तांच्या मंत्रिमंडळांत आशिल्ले खुबशे जाण आयज परत मंत्री आसात. प्रत्यक्षांत तांच्या तेन्नाच्या मंत्रिमंडळांतले सुमार अर्दे मंत्री सध्या डॉ. प्रमोद सावंत हांच्या सरकारांत मंत्रिपदार आसात. विशेश म्हळ्यार मूळ भाजपाचे वा भाजपाच्या उमेदवारीचेर पयली वेंचणूक जिखिल्ले फकत तिनूच मंत्री सध्याच्या मंत्रिमंडळांत आसात. स्वता डॉ. प्रमोद सावंत, सुभाष फळदेसाय आनी बिरेस्तारा मंत्रिपदाचो सोपूत घेवन रमेश तवडकार.
1994 वर्सा दिगंबर कामत हेय भाजपाचे उमेदवार म्हणून पयले वेंचून आयिल्ले. मात 2005 वर्सा ते परत कॉंग्रेसींत परतले आनी 2007 वर्सा कॉंग्रेसीन तांकां मुख्यमंत्रीपद दिलें. 1990 उपरांत गोंयांत सुरू जाल्लो नेतृत्व बदल आनी सत्तांतराच्या प्रकारांचेर मात करून मुख्यमंत्री म्हणून तांणी पांच वर्सांचो कार्यकाळ पुराय केल्लो. 2012 मध्ये गोव्यात भाजप सत्तेंत आयले उपरांत दिगंबर कामत विरोधांत रावले.
सप्टेंबर 2022 वर्सा कॉंग्रेसच्या आठ आमदारांनी भाजपांत प्रवेश केलो, तातूंत मायकल लोबो आनी दिगंबर कामत अग्रभागी आशिल्ले. 2012 वर्सा मुख्यमंत्रीपदाची कारकीर्द सोंपले उपरांत आतां वट्ट 13 वर्सांनी ते परत मंत्रीपदार येतात.
रवी नायक, सुदीन ढवळीकार, विश्वजीत राणे, बाबूश मोन्सेरात आनी निळकंठ हळर्णकार हे दिगंबर कामत हांच्या मंत्रिमंडळांत मंत्री आशिल्ले. तांतले सुदीन ढवळीकार सोडून हेर सगले सध्या भाजपांत आसात.
सध्याच्या मंत्रिमंडळांत कॉंग्रेसींतल्यान भाजपांत आयिल्ल्यांचोच आंकडो चड आसा. रवी नायक, दिगंबर कामत, मॉविन गुदिन्हो, सुभाष शिरोडकार, विश्वजीत राणे, बाबूश मोन्सेरात आनी नीळकंठ हळर्णकार हे फाटलीं कांय वर्सां कॉंग्रेसींतल्यान भाजपांत आयिल्ले फुडारी आशिल्ले. सुदिन ढवळीकार मगोचे फुडारी. रोहन खंवटे अपक्ष आमदार आशिल्ले, तांणीय कांय वर्सां आदीं भाजपांत प्रवेश केलो.
कॉंग्रेसींतल्यान आयिल्ले चडशे आमदार मंत्रिपदार आसात. उरिल्ले कांय जाण वाट पळयतात. मूळ भाजपाचे आमदार निलेश काब्राल, उल्हास नायक तुयेंकार, देविया राणे, दाजी साळकार, प्रेमेंद्र शेट, ज्योशुआ डिसोझा हांचे कडेनूय कांयच ना. हातुंतल्या कांय जाणांच्या नशिबांत महामंडळूय ना.