भांगरभूंय | प्रतिनिधी
मुंबय पुलिसांची कारवाय
पणजी : अंडरवर्ल्डचा डॉन दावूद इब्राहीमाच्या घुंवळे वखदां नेटवर्काचेर नार्कोटिक्स कंट्रोल ब्युरोन ’सर्जिकल स्ट्रायक’ केला. दावूदाचो सामको विस्वासू आनी मुंबयचो ड्रग्ज रॅकेटाचो मुखेल सुत्रधार दानिश चिकना उर्फ दानिश मर्चंट उर्फ फँटम हाका ‘एनसीबी’च्या मुंबय पंगडान हडफड्यां अटक केली.
ही कारवाय ‘एनसीबी’न आयतारा मध्यानरातीं केल्ले गुप्त मोहिमे वरवीं केली. अटक जाली तेन्ना दानिशा वांगडा एक बायलूय आशिल्ली, हाका लागून अटक प्रक्रिये मजगतीं हणजूण पुलीस स्टेशनाच्या बायलां पंगडाची मजत घेतिल्ली.
दानिश आनी ताच्या वांगड्यांचेर मुंबयच्या डोंगरी वाठारांत दावूदा खातीर ड्रग्ज फॅक्टरी चलोवपाचो गंभीर आरोप आसा. दानीश हो दाऊदच्या नेटवर्क खाला ड्रग्साचें उत्पादन, वांटप आनी वेवस्थापन करपी मुखेल ‘ऑपरेटर’ म्हणून वळखतात. अंडरवर्ल्डांत तो एमडी ड्रग्सचो मुखेल पुरवणदार म्हणूनय फामाद आसा. जामिनाचेर सुटले उपरांतूय दानिश गुप्तपणान आपलो अवैध धंदो नव्या नेटवर्कचे मजतीन चलयता, मात ‘एनसीबी’च्या रडारवेल्यान तो सुटपाक शकलो ना.
दानिश चिकना पयलेच खेपो अटक जावंक ना. ताका ह्यान पयलीं डिसेंबर २०२४ वर्सा मुंबय पुलिसांनी ड्रग्स प्रकरणांत अटक केल्ली. नोव्हेंबर २०२४ वर्सा मोहम्मद आशिकुर सहिदुर रहमान आनी रेहान शकील अन्सारी हांचें अटकेंतल्यान दानिशचें कनेक्शन उक्तडार आयिल्लें. २०११ वर्सा दाऊद कडेन संबंदीत एका वेगळ्या ड्रग्ज फॅक्टरी ऑपरेशनाच्या विशींय ताका राजस्थानांतल्यान मुंबय हाडिल्लो.
फाटल्या वर्सा अटक जाल्ल्या एका प्रकरणांत अटक जाल्ल्या दुबाविता कडल्यान वट्ट १९९ ग्रॅम घुवळे वखदां जप्त केल्लीं आनी ह्या सांठ्याची पुरवण करपाक दानिश चिकनाच जापसालदार आशिल्लो.
मजगतीं, मुंबय क्रायम ब्रँचान दाऊदच्या नेटवर्क कडेन जोडिल्ले वट्ट २५६ कोटी रुपयांच्या ड्रग्ज रॅकेटाक उक्तडार हाडलां. दुबयच्यान हालींच प्रत्यार्पण करपी सलीम डोलाचो लागींचो मोहम्मद सलीम सुहेल शेख हाका अटक करून क्राइयम ब्रँचान हें व्हड येस मेळयलें.
ड्रग्ज फॅक्टरी प्रकरणाचो तपास करतना पुलिसांक सांगली ‘मेफेड्रोन’ तयार करपी गुपीत कारखानो मेळ्ळो. २५ मार्च २०२४ दिसा घातिल्ल्या छाप्यांत १२२.५ किल ‘एमडी’ (बाजार मोल २४५ कोटी रुपया) जप्त केलें. दुबय रावपी तस्कर सलीम डोला भारतांत बसून ह्या घुवळे वखदांच्या नेटवर्कचें संचालन करतालो, जाल्यार सलीम शेख हो दुबय रावपी फायनान्सर्स आनी महाराष्ट्र-गुजरात हांगच्या ड्रग्स वाटप्यां मदीं समन्वयक म्हणून काम करतालो. ह्या पुराय ऑपरेशनांतल्यान आतां मेरेन १५ आरोपींक अटक केल्या. वट्ट १२६ किल ‘मेफेड्रोन’ (आंतरराष्ट्रीय बाजारांत २५२ कोटीं परस चड किंमत) आनी ४.१९ कोटी रुपयांची रक्कम जप्त केली.
दाऊदच्या ह्या ड्रग्ज नेटवर्काचेर ’एनसीबी’ आनी मुंबय क्रायम ब्रँचान केल्ले जोड कारवायेक लागून आंतरराष्ट्रीय ड्रग्ज सिंडिकेटाची जायती म्हत्वाची तपास यंत्रणांच्या हाताक लागपाची शक्यताय आसा. दानिश चिकना हाका ट्रांझिट रिमांडा खातूीर म्हापशें पयलो वर्ग न्यायालयांत हजर केलो आनी उपरांत ताका फुडल्या तपासा खातीर मुंबय व्हेलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
