भांगरभूंय | प्रतिनिधी
दावणगिरी, खबरां संस्था : कर्नाटकाच्या दावणगिरी जिल्ह्यांत एक अस्वस्थ करपी घडणूक जाल्ल्याची खबर मेळ्ळ्या. एका तरणाट्या भुरग्याचेर ताच्याच समाजांतल्या लोकांनी क्रूर अत्याचार केल्ल्याचो आरोप आसा. आयज मंगळारा उजवाडाक आयिल्ले हे घडणुकेचो व्हिडियो उपरांत व्हायरल जावन सगळेकडेन तिडकीचें ल्हार पातळ्ळां. ह्या तरणाट्यांचेर कडक कारवाय करची अशी मागणी तांणी केल्या.
चन्नागिरी तालुक्यांतल्या नल्लूर लागसार आशिल्ल्या अस्तापनहळ्ळी गांवांतली ही खबर. हक्की- पिक्की आदिवासी समाजांतल्या ह्या भुरग्याक माडयेक बांदून बडयलो. सामकी भिरांकूळ आनी मनीसपणाक खत लावपी गजाल म्हणल्यार ताचे कपडे काडून अंडरवियरींत हुमले (तांबड्यो मुयो) सोडले, असो आरोप आसा. हें करपी ताच्याच समाजाचो तरणाटो. भुरग्याचेर चोरयेचो आरोप जाले उपरांत ताका ख्यास्त म्हणून हो हल्लो केल्ल्याची म्हायती मेळ्ळ्या.
कांय दिसां आदीं ही घडणूक घडली तरी सोशल मिडिया प्लॅटफॉर्मांचेर हो व्हिडियो व्हड प्रमाणांत प्रसारीत जाले उपरांतच ती लोकांच्या लक्षांत आयली. हो व्हिडियो पळोवन थळावे अधिकारी रोखडेच जागे जाले.
दावणगिरी पुलीस अधीक्षक उमा प्रशांत हांणी चन्नागिरी पुलिसांक गांवांत भेट दिवन पुराय तपशील एकठांय करपाचो आनी व्यापक अहवाल सादर करपाचो आदेश दिला. तपास सुरू आसा अशें तिणें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
