भांगरभूंय | प्रतिनिधी
भांगरभूंय, खबरां मेज
पणजी दाल्गादो कोंकणी अकादेमीचे वतीन सर्गेस्त प्रभाकर तेंडुलकार हांची जयंती व्हडा उमेदीन मनयली. पणजेच्या रेजिनाल्ड सभाघरांत ही कार्यावळ आयोजीत केल्ली. रोमी कोंकणीच्या प्रचारा खातीर तेंडुलकार हांणे वावर केल्लो. ते संस्थचे आदले संस्थापक भांडारी आशिल्ले तरणाट्या उदेत्या लेखकांक लिखांणातलीं आपली प्रतिभा दाखोवपाक ताणे सदांच मजत केली अशें ज्येश्ठ लेखक तोमाझीन कार्दोजान हाणे सांगलें.
सुरवेक डीकेएच्या मानेस्तांनी तेंडुलकाराच्या फोट्याक फुलांचो हार घालून आर्गां ओंपलीं. ह्या वेळार डीकेएचे अध्यक्ष सेल्सो फर्नांडीस, उपाध्यक्ष विलियम फर्नांडीस, सचीव फादर मायरन जेसन बार्रेटो, लेखक आफोन्सो ब्रागांझा आनी तांची धूव दर्शना तोरस्कार हाजीर आशिल्ली.
प्रभाकर तेंडुलकार रोमी लियेंतल्यान गोंयकार सातोळ्याचो संपादक आशिल्लो. पुर्तूगेज तेंपार ए वांगार्डा ह्या दिसाळ्याच्या कोंकणी विभागाचें संपादन करतना रोमन लिपींत कोंकणीच्या प्रचारा खातीर ताणे सक्रीय वांटो घेतिल्लो. अँथनी मिनेझीस, विली गोयस, आफोन्सो ब्रागांझा आनी आल्वारो गोम्सान तेंडुलकाराच्यो यादी सांगल्यो. फादर मायरन जेसन बार्रेटो हाणे सुरवेक सगल्यांक येवकार दिलो. विलियम फर्नांडीसान उपकार मानले, एव्हरेस्टो हाणे कार्यावळीचें सूत्रसंचालन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
