भांगरभूंय | प्रतिनिधी
म्हापशें : परवानो नेमांचें उल्लंघन करपी नायट लायफ सुवातींचेर सुरू आशिल्ल्या कारवायेचो एक भाग म्हणून, राज्य सरकारान कायदेशीर गरजांचो परत-परत भंग केल्ल्यान आनी साबार खात्यांच्या आदल्या नोटिशींक जाप दिवपाक अपेस आयिल्ल्यान वादग्रस्त थारिल्लो दायज नायट क्लब बंद केलो. वरिश्ठ अधिकारी कबीर शिरगांवकार हांच्या फुडारपणा खाला अंमलबजावणी समितीन ताका सील मारलें.
अबकारी खातें, उजो पालोवपी दळ आनी आपत्कालीन सेवा, नगर आनी देश नियोजन (टीसीपी) आनी थळाव्या पंचायतीच्या पंगडान बेकायदो कामां, गर्दी जमयता आनी सुरक्षेचें उल्लंघन केल्ल्याच्या कागाळींची दखल घेवन संयुक्त तपासणी केल्या उपरांत ही कारवाय केल्या, अशें कारवाय करपी अधिकाऱ्यांनी सांगलें.
हो क्लब वैध उजो पालोवपी दळाच्या परवान्या बगर चलतालो. तशेंच वेपार आनी अबकारी परवान्याच्या अटींचें उल्लंघन करता अशें तपासा वेळार समितीक दिसून आयलें.
“फाटल्या तपासणे वेळार सोदून काडिल्ल्यो उणाव सुदारपा खातीर आस्थापनाक फावो तो वेळ दिल्लो. नेमांचें उल्लंघन करून पाळो दिवंक नाशिल्ल्यान आमचे कडेन सुवात सील करपा बगर पर्याय नाशिल्लो,” अशें एका वरिश्ठ सरकारी अधिकाऱ्यान सांगलें.
उजो पालोवपी दळाच्या आनी आपत्कालीन सेवेच्या अधिकाऱ्यान सांगलें की भौशीक सुरक्षे खातीर ही कारवाय केल्या.
खास करून हालींच्या घडणुकां उपरांत, उजो सुरक्षेच्या मानकांचेर आमी तडजोड करूंक शकनात. शिटकावणी दिवन लेगीत परत-परत उल्लंघन केल्यार कायद्या कडेन स्पश्ट दुर्लक्ष दिसून येता, अशें अधिकाऱ्यान सांगलें. क्लबाक जोडिल्ल्या ध्वनी प्रदुशण, येरादारीची कोंडी, रातीं उसरां जावपी गडबड हांची कागाळ थळाव्या रहिवाशांनी खूब आदीं सावन केल्या.
परवाने रद्द करप आनी संबंदीत कायद्यां खाला कायदेशीर कारवाय करपा सयत फुडली कारवाय करपाचो विचार सुरू आसा, अशें सरकारी सुत्रांनी सांगलें. दर्यादेगेवेल्या वाठारांतल्या आनीक आस्थापनांचो नियाळ सुरू आसा आनी फुडल्या कांय दिसांनी अशेच तरेचे उपाय येवंक शकतात अशेंय अधिकाऱ्यांनी सुचयलां.
मजगतीं, प्रतिक्रिया घेवपा खातीर क्लब वेवस्थापनाकडेन संपर्क सादपाचो यत्न अपेशी थारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
