भांगरभूंय | प्रतिनिधी
आमचें गोंय म्हणल्यार कलेची खण. हांगाचो प्रत्येक मनीस कलेंत पारंगत आसा. तांच्या सुप्त कलांक वाव दिवप म्हणल्यार हो लोकोत्सव. हो लोकां खातीर आयोजीत केल्लो उत्सव. हांगा देशभरांतल्यान सगल्या जाती, धर्माचे लोक एका पांख्या खाला वावुरतात. होच ह्या लोकोत्सवाचो हेतू. ताका लागून गोंयची कला नवे पिळगे मेरेन पावतली, हातूंत दुबाव ना.
खरें म्हणल्यार लोकोत्सव गांवगिऱ्या वाठारांनी मनोवपाक जाय. मळबा कडेन सर्त करपी माड, भिल्लेमाड, तांच्या चुडटांत सळसळ आवाज, तरेकवार फुलांचो परमळ, थंड वाऱ्याची झुळूक, सुकण्यांचो किलबिलाट, दर्याच्या ल्हारांचो खळखळाट…. ही सगली सैमाची देणगी. खरेंच प्रसन्न, आनंददायी वातावरण.तें सगल्यांक मोनेळ घालता. मौज मजा करपाचे, ताचेच वांगडा भुंयेचें दायज अणभवपाचो वाठार म्हणजे लोकोत्सव.
गोंयच्या दादले, बायलो आनी भुरग्यां मदीं कला भरिल्ली आसा. तरणाटे पिळगीय कलेंत फिशाल. भुरगीं गीतां, नाच, अभंग, नाटकुलीं सादर करतात. बायलांचो पंगड फुगडी, धालो, दिवजां, अभंग, रोमटां मेळ, घुमटां आरती सादर करतात. रांदपाचे विवीध जिनस करतात. लोकोत्सवांत तांचें दालन आसता.
लोकोत्सवांत तरातरांची दुकानां घालतात. आपणें केल्लीं खाणां, टाकावूंतल्यान टिकावू वस्तू, बॅगां, तोरणां, मातये पसून केल्ल्यो बुडकुलो, मिलेर आनी हेर वस्तू, वखदां, कपडे, भेटवस्तू एकेच कडेन मेळपाचें ठिकाण म्हणल्यार लोकोत्सव. कला अकादमी वाठारांत भरिल्ल्या लोकोत्सवांत साबार राज्यांची कला, लोककला पळोवपाक मेळटा. हांगा आदिवासीं ख
लोकोत्सव म्हणल्यार व्हडलो चोंबो. जो भेदभाव करीनासतना एकाच पांख्या खाला लोकांक हाडटा. वळख जाता, विचारांचे दिवप- घेवप जाता. लोकोत्सव हो जणू संस्कृतायेचें प्रतिक. भावी पिळगेन हें दायज सांबाळून दवरुंक जाय. सरकारान, कला, संस्कृती खात्यान आमच्या भुरगीं, तरणाट्यां मदली कला विकसीत जावपी, ती लोकां सामकार येवची, राज्याची सांस्कृतीक उदरगत जावची, हे खातीर यत्न करचे.
– सिद्धी तिळवे
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
