भांगरभूंय | प्रतिनिधी
शिंयाळे दीस येतात, शिंयाळ्या दिसांनी दंवान भिजिल्लें, लिपिल्लें गोंय आयजय आसा. शीं शारांत काँक्रीटाच्या रानांनी उणें जावंक लागलां, गांवूय आदलेवरी गोठेवचे ना. पन्नास वर्सां पयलींचें गोंय तशेंच कशें उरतलें? मुक्ती वांगडा गोंय उदरगतींतय फुडें गेलां, मुक्तीमागीरची उदरगत नवें रूप घेतना सांबाळिल्लें दायज सिनेमांनीय दिसता. भारताच्या आंतरराष्ट्रीय सिनेउत्सवाचें गोंयांतलें मुखेल थळ आदलें राज्य वैजकी म्हाविद्यालय, हॉस्पिटल. दायजांतलो कांय वांठार मोडून उबारिल्लें गोंयचें पयलें मल्टीप्लेक्स 21 वर्सांचें जालां. सरभोंवतण पांचवीताल्ल जातना मल्टीप्लेक्सांत बदल जाल्यात. इफ्फींतल्यान फिल्मांपासत थेटरांतले पड्डे व्हड जातना इफ्फीक स्क्रीन नेमाळ्याचो वांगड अंदूं मेळ्ळा. पन्नास वर्सांचें स्क्रीन नेमाळें डिजीटल जालां, इफ्फींतलीं फिल्मी दिसाळीं फकत डिजीटलांत गेल्यार पेपरलेस इफ्फीचें पाचवें पावल व्हड जातलें.
ए आय – आर्टिफिशल इंटेलिजन्सांतल्यान सिनेमांत जावपी बदल ए आय सिनेमांतल्यान इफ्फींत दिसतलो. म्हायती तंत्रज्ञानाची जोड मेळिल्ल्यान येवपी ए आय म्हणल्यार फकत कृत्रिम बुद्धिमता न्हय जाल्यार तेंपाप्रमाणे बदलत गेल्लें शिक्षण. एआयंत घुस्पून गेल्लो सिनेमा मनीसपण सोडचोना हाची जतनाय घेवपाक जाय. त्या विशयाचेर भासाभास ज्येश्ठ, तरणाटे सिनेमा दिग्दर्शक, निर्माते करतले. तीच तर इफ्फीची ज्येश्ठनीत. भारतरत्न लता मंगेशकर हांच्या अजरंवर गीतांनी वंदे मातरम इफ्फीक जागयतलें.
संगीत सिनेमाचो आत्मो, नवे गीतकार, गीतां, संगीतकार, संगीत उद्येगांत एआयचो उपेग जाता. शिक्षणांत संगीत, नाचाचे कुशळटायेंत एआय येतना सिनेगीतांतल्यान तंत्रज्ञान पयस उरुंक ना. ज्येश्ठ भारतीय सिने दिग्दर्शक इफ्फींतल्या मास्टरक्लासांनी त्या विशयाचें म्हत्व अणभवांतल्यान सांगतले.
भारतीयां वांगडा विदेशी सिनेमा निर्मणेंत आशिल्ले मास्टरक्लासांत आसात. ज्येश्ठांचे अणभव तरणाट्यांक शिकयतले, तीच तर सिनेमाची ज्येष्ठनीत, समाजाक जागोवपाची, समाज सुदारपाची.
समाजाक सुदारपी 100 टक्के सिनेमा इफ्फींत नासता. समाजांतल्या वायटाचें, फुडारांतल्या संकश्टांचें चित्र दाखोवपी सिनेमा कल्पनेन बांदला हें व्हड अक्षरांनी पड्ड्यार दाखोवपाक जाय. मोबायलावेल्या सिनेमांतल्या म्हायतीचे समाजाचेर जाल्ल्या परिणामांतल्यान खून, मारामाऱ्यो, पिडापीड वाडटा, मोबायल मानसिकता घडयता जाल्यार तेंय सिनेमांनी दिसपाक जाय. थंय भारतीय सेन्सर बोर्डाची कातर फांट्यांतल्यान चार दिकांनी देशांत वचची. सेन्सर बोर्डाच्या वांगड्यां भितर तंत्रिक गिन्यान आशिल्लेय वांगडी आसचे. उतरां इतलींच चित्रां, अभिनय सेन्सर बोर्डाच्या वांगड्यांनी अभ्यासपाक जाय.
इफ्फी पिरायेन व्हड जाता तेन्ना देशांतय देशी सिनेमाची आंतरराष्ट्रीय पावंड्याची निर्मणी जावंक शकता. स्टुडिओ, सिनेनिर्मणी घरां बदलतात तेन्ना विदेश भारतांत येता, कलाकारांकय बॉलिवूड सिनेमा आसपावन घेता. ज्येश्ठांनी ते खातीर इफ्फींतल्यान मांडवळीची बुनयाद गोंयच्यान घाली.
गोंयचे शांतीकायेचे भोंवतणेंत इफ्फींत बदल करप शक्य जाले. गोंय सिनेशुटिंग थळ म्हणून नामना जोडटना राज्यांत सिनेनिर्मणेक फुडारांत उर्बा मेळपा पासत वर्सभराच्यो सिने शिक्षणाच्यो कबलाती जावच्यो. इफ्फीच्या घरा परस सिनेनिर्मणेचें शिक्षण डिजिटल माध्यमांतल्यान दिवपाची सुविधा इफ्फी थळार हाडपाचे यत्न जावचे. सिने शिक्षणांतले आधुनिकतायेंत एफटीआयआय आयजय मुखार आसा. गोंयकारांक ते शिक्षण संस्थेंत कांय सुवाती राखून दवरपापासत विचार जावचो.
इफ्फींत गोंयच्या कोंकणी साहित्यिकांच्या पुस्तक प्रदर्शनांतल्यान साहित्यिकांक सिने संवसारांत पावोवपाची संद आसा. माकनिझ पॅलेसीत ल्हानसो कोनसो साहित्या पासत मेळचो. भारतीय, विदेशी सिनेमा ए आय माध्यमात वता तेन्ना गोंय फाटीं उरुंक जायना.
इफ्फीक वीस तीस वर्सांआदीं येवपी प्रतिनिधी, पत्रकार आयज दिसचेना. आरंभाक तांच्या बोवाळांतल्यान गोंयांत इफ्फी सुदारत गेला, आडमेळीं उणीं जाल्यांत. थळाव्यांक डेली तिकेटींगांतल्यान सांजवेळा सिनेमा पळोवंक मेळचो. भायल्या कार्यावळींपरस इफ्फीच्या आयोजनाचो पावंडो तंत्रिक नदरेन सुदाल्ल्यार गोंयच्या सगल्या सिनेमाघरांनी इफ्फींतलो खासा सिनेमा वचूंक येता. वेगळो इफ्फी, सिने उत्सवांचो चॅनेल देश पावंड्यार बांदपाचो अभ्यास, भासाभास जावची.
सिनेमापरस इफ्फींतली सिनेमा विशींची भासाभास देशांत सिनेशिक्षण घेवपी विद्यार्थ्यांक आपोवन हाडटा. इफ्फीवेळार ते आपवावुरपी जातात, शिकतात, कांय राज्यांनी इफ्फींतल्यान बंद पडिल्लीं सिनेमाघरां सुरु केलीं. इफ्फीचो लाव देसाक जाला, विदेसय घेता, तांची मजत घेवन गोंय सिनेनिर्मणेंत, सिनेमा विशींच्या तंत्रज्ञानांत फुडें व्हरपाक म्हायती, कला आनी संस्कृती मंत्र्यांनी येवजण करची.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
