भांगरभूंय | प्रतिनिधी
फोंडें: भाजप प्रदेशाध्यक्ष म्हूण निवड जाल्ले दामू नायक हे पक्षाचे निश्ठावंत कार्यकर्ते आसात. खंयच्याय पदाची अपेक्षा करिनासतना तांणी पक्षा खातीर केल्लें कार्य म्हत्वाचें आसा. भाजप प्रदेशाध्यक्ष दामू नायक हांणी फुडारांत पक्षांतर करतल्यां परस निश्ठावान कार्यकर्त्यांक मानाची वागणूक दिवपा खातीर यत्न करपाचें आवाहन वीज मंत्री सुदिन ढवळीकार हांणी केलें.
दोन खांब-कवळें आनी रामनाथी हांगा हॉटमिक्स कामाचो शुभारंभ तशेंच रामनाथी, कवळें आनी कवळें मठ हांगा भुंयगत वीज वाहिन्या खातीर नव्यान उबारिल्ल्या ट्रान्सफॉर्मराच्या उक्तावणा वेळार ढवळीकार उलयताले.
ह्या वेळार सरपंच रामचंद्र नायक, शैलेंद्र पणजीकार, चंदन नायक, मनुजा नायक, जिल्हो पंचायत वांगडी गणपत नायक, दामोदर नायक, वीज खात्याचे कार्यकारी अभियंतो सुदन कुंकळयेंकार आनी हेर मानेस्त हाजीर आशिल्ले.
फाटल्या कांय वर्सांत खूबशा आमदारांनी पक्षांतरां केल्यांत. आदल्या मुख्यमंत्र्यांनी लेगीत पक्षांतर करून स्वताची पोळी भाजून घेवपाचो यत्न केल्लो. पूण पक्षा खातीर त्याग करून काम करपी कार्यकर्त्यांची दखल पक्षश्रेश्ठी निश्चीतपणान घेत आसतात. गोंयांत भाजप आनी मगो पक्षाची युती तिगून उरपा खातीर भाजप प्रदेशाध्यक्ष दामू नायक हांचे कडेन चर्चा करतले अशें मंत्री ढवळीकार हांणी सांगलें.
कवळें आनी रामनाथी वाठारांतल्या लोकांक विजेची समस्या भेडसायतली. भुंयगत वीज वाहिन्याक लागून लोकांचे प्रस्न आतां सुटावे जातले. तेच बरोबर फोंडकुलांनी भरिल्ल्या रस्त्याक लागून वाहन चालकांक त्रास सोंसचो पडटालो. रस्त्याचें हॉटमिक्स केले उपरांत वाहन चालकांचो प्रस्न लेगीत सुटावो जातलो अशें मंत्री ढवळीकार हांणी सांगलें.
हाचे पयलीं मगो पक्षाच्या तिकेटीचेर वेंचून आयिल्ल्या खूबशा आमदारांनी पक्षांतरां केल्यांत. त्या पक्षांतर केल्ल्या आमदारांची स्थिती गोंयच्या मतदारांनी वेंचणुके वेळार दाखोवन दिल्ल्याचें वीज मंत्री सुदिन ढवळीकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
