भांगरभूंय | प्रतिनिधी
पणजी ः भाजपाचे प्रदेशाध्यक्ष दामू नायक कृशी मंत्री रवी नायक हांकां मेळ्ळे. हाका लागून मंत्रीमंडळ फेरबदला विशीं परतून चर्चा सुरू जाल्या. फोंड्यां जाल्ल्या भाजपा कार्यकर्त्यांच्या मेळाव्या निमतान मेळिल्ले, ह्या वेळार मंत्रीमंडळ फेरबदला विशीं कसलीच चर्चा जावंक ना अशें दामू नायक हांणी स्पश्ट सांगलें.
बिरेस्तारा सकाळीं कृशी मंत्री रवी नायक हांच्या फोंडेंच्या हॉटेलांत ही गुपीत बसका जाली. कार्यकर्ता मेळाव्या संबंदीत बसका इतली गुपीत कित्याक? असो प्रस्न उप्रासता. मंत्रीमंडळांत फेरबदल करपा विशीं फाटले कितलेशेच दीस चर्चा चालू आसा. हे संबंदी मुख्यमंत्री डॉ. प्रमोद सावंत आनी प्रदेशाध्यक्ष दामू नायक दिल्लींत फुडाऱ्यांकूय मेळ्ळ्यात. खंयच्या मंत्र्यांक वगळपाचे हाचेर एकमत नाशिल्ल्यान मंत्रीमंडळांत फेरबदल करपाक कळाव जाता.
महाराष्ट्रवादी गोमंतक पक्षा कडेन एक मंत्रीपद आनी एक म्हामंडळाचे मंत्रीपद आसा. मगोच्या मंत्रीपदाचेर सुकाणू समितीनय हरकत घेतिल्ली. मगोचे मंत्रीपद काडून उडोवपाची मागणी आसतना मगोचे अध्यक्ष दीपक ढवळीकार आनी वीज मंत्री सुदीन ढवळीकार हांणी दिल्लींत राष्ट्रीय सरचिटणीस बी.एल. संतोष हांची भेट घेतली. युती वांगडा मगोनूय मंत्रीपद तिगोवन दवरपाचो यत्न सुरू केल्ल्यान स्थितीत बदलल्या. दामू आनी रवी हांचे मदीं जाल्ले अचकीत आनी गुपित बसकेक लागून परतून चर्चा सुरू जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
