भांगरभूंय | प्रतिनिधी
मुख्यमंत्र्यांच्या बंगल्यार आयज बसका
पणजीः फोंड्यां आयोजीत ’आदिवासी प्रेरणा दीस’ कार्यावळींत आदिवासी कल्याण खात्याचेर आनी पर्यायान मुख्यमंत्री डॉ. प्रमोद सावंत हांचेर केल्ली टिका आनी हाका लागून वादांत सांपडिल्ले कला आनी सांस्कृतीक खात्याचे मंत्री गोविंद गावडे सध्या राज्यभर चर्चेत आसात. तांकां मंत्रीमंडळांतल्यान काडून उडोवपाची मागणी जाता. तशेंच तांकां काडून उडल्यार वादळ येतलें अशी शिटकावणी आदिवासी भावांनी दिल्या.
मजगतीं ह्या सगल्या प्रकरणां उपरांत भाजप प्रदेशाध्यक्ष दामू नायक आयज मंत्री गावडे हांचे कडेन चर्चा करतले. आल्तिनोर मुख्यमंत्री डॉ. प्रमोद सावंत हांच्या बंगल्यार आयज सांजेवेळार बसका जातली. मंत्री गावडे यांची बाजू आयकून घेतले उपरांत ते विशींचो अहवाल दामू नायक पक्षश्रेश्टीं मेरेन पावयतले. उपरांत गावडे हांचे विशीं ’निर्णय’ जातलो.
आयिल्ल्यो प्रतिक्रिया
गावडेंच्या त्या वक्तव्याची भाजपच्या फुडार्यांनी गंभीर दखल घेतली. ’उखल्ली जीब लायली ताळ्याक’ अशें जावचें ना. असलीं बेशिस्तपणां खपोवन घेवचे ना, अशें म्हणून प्रदेशाध्यक्ष दामू नायक हांणी गावडें विशीं प्रतिक्रिया दिल्ली. जाल्यार ’सरकारांतल्या जापसालदार मंत्र्यांनी जापसालदारकेन उलोवंक जाय’, अशी शिटकावणी तशेंच प्रतिक्रिया मुख्यमंत्री प्रमोद सावंत हांणी दिल्ली. तशेंच खासदार सदानंद शेट तानावडे, सभापती रमेश तवडकार हांणीय गावडेंक सोलून काडिल्ले. दुसरे कडेन मात ’गोविंद गावडे हांका मंत्रीमंडळांतल्यान काडचें न्हय’ अशें म्हणीत ’उटा’ संघटणेन सरकाराचेर चेंपण हाडपाचे यत्न सुरू केल्ल्याचेंय दिसलें.
आतां सगल्यांचें लक्ष चर्चे कडेन
मंत्री गावडे हांच्या वक्तव्याक लागून गोंयचें भाजपा सरकार त्रासान आसा. हाका लागून पक्षांतल्या वरिश्ठ फुडार्यांनी गावडे हांचेर शिस्तभंगाची कारवाय करपाची शिटकावणी दिल्या. ह्या सगल्या घडोमोडीं उपरांत आतां हजारांनी पक्ष वावुरपी आनी राजकारण मोगींचें लक्ष मुख्यमंत्र्यांच्या बंगल्यार जावपी चर्चे कडेन लागून आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
