भांगरभूंय | प्रतिनिधी
दिल्लींत पक्षश्रेश्टीं कडेन चर्चा जाले उपरांतूच कारवाय: दामू नायक
पणजी : पं. दीनदयाळ उपाध्याय जयंतीचे कार्यावळी खातीर भाजप प्रदेशाध्यक्ष दिल्लीक गेल्ल्यान मंत्री गोविंद गावडे हांचेर जावपी कारवाय मुखार धुकल्ल्या. तीन दीस दिल्लीक रावून आपूण मंत्री गोविंद गावडे हांचेवेले कारवाये विशीं पक्षश्रेश्टीं कडेन चर्चा करतलों. आयतारा रातीं गोंयांत आयले उपरांत सोमारा सकाळीं गावडे कडेन उलोवन फुडले कारवाये विशीं निर्णय घेतले, अशें नायक हांणी शुक्रारा रातीं ‘भांगरभूंय’ कडेन उलयतना सांगलें.
फोंडेंच्या प्रेरणा दीस कार्यावळींत उलयतना मंत्री गावडे हांणी मुख्यमंत्री डॉ. प्रमोद सावंत हांचे कडेन आशिल्ल्या अदिवासी कल्याण खात्याच्या कामाचेर टिका केल्ली. पणजेच्या श्रमशक्ती भवना सकयल कंत्राटदारां कडल्यान ‘दिवप घेवप’ जावन फायली वयर पावयतात, असो आरोपूय तांणी केल्लो. गावडे हांच्या ह्या वक्तव्या उपरांत राज्याच्या राजकारणांत बरोच बोवाळ जाला. सत्ताधार्यां कडल्यान गावडेंचेर, जाल्यार विरोधकां कडल्यान सरकाराचेर टिका जायतूच आसा. ह्या वक्तव्या प्रकरणांत मंत्री गावडे हांचेर कारवायेची हमी मुख्यमंत्री आनी दामू नायक ह्या दोगांयनी दिल्ली.
दामू नायक हे फाटले कांय दीस गोंयां भायर आशिल्ले. बिरेस्तारा सांजे वेळार ते गोंयांत दाखल जाले. मात शेनवारा आनी आयतारा दिल्लींत पं. उपाध्याय हांच्या जयंती निमतान ते बिरेस्ताराच दिल्लीक गेले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
