दाभोलकर, पानसरे, गौरी लंकेश हत्येचो तपास फकत राजकीय हेतूनः डॉ थडानी

भांगरभूंय | प्रतिनिधी

भांगरभूंय । प्रतिनिधी
फोंडेंः डॉ नरेंद्र दाभोलकार, गोविंद पानसरे, एम एम कलबर्गी आनी गौरी लंकेश ह्या नास्तिकवादी आनी शारांतल्या नक्षलवादांच्या हत्येच्या तपासांत राजकारण चालू आसा. ठोक पुरावे नासस्तना हिंदुत्वनिश्ठांक आरोपी करून बंदखणींत वडयल्यात. तांचेर आरोपपत्र दाखल केले मात उपरांत तपास यंत्रणांनी हत्ये खातीर अटक केल्ल्या आरोपीं परस नवेच आरोपी आशिल्ल्याचो दावो केला. ह्या हत्येचो तपास फकत राजकीय हेतून चल्ला अशें  ‘द रॅशनलिस्ट मर्डर्स’ ह्या पुस्तकाचो लेखक डॉ. अमित थडानी हांणी सांगलां.
रामनाथी हांगा वैश्वीक हिंदू राष्ट्र महोत्सवांत आपल्या पुस्तकाच्या प्रकाशन कार्यावळींत उलयताले. ह्या वेळार माचयेर हिंदू विधीज्ञ परिशदेचो संस्थापक वांगडी सुरेश कुलकर्णी,  परिशदेचे राष्ट्रीय अध्यक्ष वीरेंद्र इचलकरंजीकर आनी पी कृष्णमूर्ती आशिल्ले. ह्या हत्या प्रकरणांत सेगीत आरोपी बदलप, शस्त्रां बदलप अशे बेकायदेशीर प्रकार जाले. गौरी लंकेशाची हत्या हेल्मेट घालून रातीच्या काळखांत हत्या केली अशें आसतनाय दुबावितांचे कितलेशेच फोटे काडले. पुलिसांक हेल्मेटाच्या भितरले चेरे कशें दिसले, दाभोलकर केशींत तुकडे करून दर्यांत वडयल्लें पिस्तूल सोदून काडलां असो दावो केलो. मात दर्यांत तांकां तें अखंड स्थितीत मेळ्ळें. खोल दर्यांत त्या पिस्तुलाची जोडणी कोणे केली. ह्यो हत्या कोणे केल्यो आनी कित्याक केल्यो हाचो तपास यंत्रणाची केन्नाच प्रामाणीकपणान सोद  घेतलोच ना. फकत राजकी लाबा खातीर तांचो उपेग केलो अशें थडानी हाणे सांगलें.
वीरेंद्र इचलकरंजीकर हाणे सांगलें की, नास्तिकवाद्यांच्या हत्ते उपरांत हिंदुत्वनिश्ठांक आतंकवादी थारयतात. मात साम्यवाद्यांनी कितल्या जाणांक मारले, व्हो प्रश्न कित्याक विचारनात. साम्यवाद्यांनी संवसारांत 10 कोटी लोकांच्यो हत्या केल्यात, नक्षलवाद्यांनी 14 हजारां परस चड लोकांक मारून उडयलां. मात हे कोणूच सांगना. व्हो वैचारीक आतंकवाद आसा. वैचारीक आतंकवादाच्या विरोधांत दरेकान प्रश्न विचारपाची धिटाय दाखोवपाक जाय अशें ताणी फुडें उलयतना सांगलें.
पॉप्लुलर फ्रंट ऑफ इडिया हे जिहादी संघटनेच्या आड केस लडयतां. ते खातीर आपल्याक सारक्यो धमक्यो दितात अशें पी कृष्णमूर्ती हाणे सांगलें. हरिशंकर जैन हाणे धर्मा खातीर बलिदान दितल्यांक विसरनाकात अशें सांगलें.