भांगरभूंय | प्रतिनिधी
पुणे, खबरां संस्था ः अंधश्रद्धा निर्मूलन समितीचे डॉ. नरेंद्र दाभोलकार हांच्या खून प्रकरणांतल्या पांच आरोपीं मदल्या तिगांची पुण्यांतल्या सीबीआय विशेश न्यायालयान निर्दोश सुटका केल्या. हातूंत सचिन अंदुरे आनी शरद कळसकर दोशी थारल्यात. जाल्यार डॉ. वीरेंद्र तावडे, अॅड. संजीव पुनाळेकर आनी विक्रम भावे हांची पुरावे नाशिल्ल्यान निर्दोश सुटका जाली. सुमार 11 वर्सां उपरांत आयज ह्या खून प्रकरणाचो निकाल लागलो.
निकाला उपरांत डॉ. दाभोलकर हांचो पूत हमीद हांणी प्रसार माध्यमां कडेन संवाद सादलो. न्यायालयाच्या निकालाक आमी येवकार दितात. प्रत्यक्ष खून करप्यांक ख्यास्त दिली. हाचे मुखारुय आमी झगडटले. ह्या प्रकरणांतल्या खऱ्या मास्टरमायडाक अटक जावंक ना. हे खातीर आमी उच्च आनी सर्वोच्च न्यायालयांत वतले अशें तांणी सांगलें.
आरोपीचे वकील साळशिंगीकर हांणीय प्रसार माध्यमां कडेन प्रतिक्रिया दिल्या. शरद कळसकर आनी सचिन अंदुरे हांकां दोशी थारावन जल्मठेपची ख्यास्त फर्मायल्या. तशेंच 5 लाखांचो दंडूय घाला. दंड भरलो ना जाल्यार ख्यास्त एक वर्स वाडयतले अशें न्यायालयान सांगलां. हेर तिगांची निर्दोश सुटका केल्या. विक्रम भावे, संजीव पुनाळेकर, डॉ. विरेंद्र तावडे हांची पुरावे नाशिल्ल्यान निर्दोश सुटका केल्या अशें न्यायालयान सांगले.
ह्या प्रकरणात पुणे पुलीस, क्रायम ब्रँच आनी सीबीआय हांचे वेगवेगळे मुद्दे आसात. आयज दोगांकय ख्यास्त जाल्या. निकालाची प्रत हातांत मेळ्ळ्या उपरांत आपूण ताचो अभ्यास करतलो आनी उच्च आनी सर्वोच्च न्यायालयांत अपील करपाची मागणी करतलों अशें साळशिंगीकार हांणी सांगले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
