भांगरभूंय | प्रतिनिधी
मुरगांव : दाबोळी- चिखली राष्ट्रीय मार्गार रेड सिग्नलाक राविल्ले एके दुचाकीक अचकीत उजो लागलो. ह्या उज्यांत पुराय स्कुटरीचो गोबर जालो. मात ह्या वेळार कसलीच व्हड दुर्घटणा घडूंक ना. उजो पालोवपी दळाच्या जवानांनी येवन उज्याचेर नियंत्रण मेळयलें.
चिखली पंचायतीचे कुसीक आशिल्ल्या राष्ट्रीय मार्गार सकाळीं 9.15 वरांच्या सुमाराक रॅड लायट आयिल्ल्यान, तिसवाडी- आगशी सावन येवपी हिरो होंडा पॅशन (जीए 07 डी 3925) जेरमिनो फर्नांडीस हांणी आपली दुचाकी थारायली. तेन्ना अचकीत ताचे दुचाकीक उजो लागलो. उज्यान रोखडोच पेट घेतिल्ल्यान फर्नांडीस लागींच आशिल्ल्या हॉटेलांतल्यान उदक हाडलें आनी दुचाकीचेर ओंतलें, मात उज्यान आनीक पेट घेतलो. उपरांत उजो पालोवपी दळाच्या जवानांनी येवन उज्याचेर नियंत्रण मेळयलें. मात ते मेरेन पुराय दुचाकीचो गोबर जालो. दुचाकीक उजो लागिल्ल्याची म्हायती मेळटाच वास्को पुलिसांनी घडणुकेचे सुवातेर येवन पंचनामो केलो. ह्या प्रकरणांत अदीक तपास वास्को पुलीस स्टेशनाचे हवालदार साईश आजगांवकार करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
