भांगरभूंय | प्रतिनिधी
कंत्राटदाराच्या बेशिस्त कामाचेर चर्चा
वास्को: दाबोळी ते क्वीनीनगर उड्डाण पुलाच्या खांब्या खातीर वालिस गॅरेज मुखारच्या रस्त्यार खणपाचें काम केल्ल्या व्हड खड्ड्यांत बुधवारा रातीं उसरां दुचाकी सयत पडून एकल्याक मरण आयलें. मारूती जाधव (४०, दाबोळे) अशें ताचें नांव. हे घडणुकेक लागून कंत्राटदाराच्या बेशिस्त कामाचेर चर्चा जाता. ह्यान पयलींय एका वीज कामगाराक मरण आयिल्लें. तशेंच एक गाडी खट्ट्यांत पडून चालक जखमी जाल्लो. ह्या सगल्या घडणुकां वेल्यान कसलोच धडो घेवंक नाशिल्ल्या कंत्राटदाराचेर कोणाचो आशिर्वाद आसा. केंद्र सरकारा वतीन उड्डाण पुल बांदिल्ल्यान कंत्राटदार कोणाकूच भियेना अशी चर्चा हांगा रंगल्या. फुडाराक आनीक कोणाचो जीव वयचे पयलीं हांगा योग्य ते उपाय करतले काय? हो एक व्हड प्रस्न सध्या हांगा उप्रासला.
दाबोळी चौक ते क्वीनीनगर हांगा उड्डाण पूल, रस्तो रुंदीकरणाचें काम सुरु आसा. हें काम सुरु आसतना हांगा ल्हान व्हड अपघात घडल्यात. हाचे पयलीं जेसीबी वरवीं काम करतना दाबोळी बोगमाळो चौकांत इंधन पायपांचें लुकसाण करपाची घडणूक घडिल्ली. उपरांत खणपाचें काम करतना रस्त्याचेर उबारिल्ले व्हड लोखणाचे बॅरिकेड्सांक जेसीबीचो धक्को लागिल्ल्यान ते बॅरिकेड् थंयच्यान वचपी दुचाकीचेर पडिल्ले. हाका लागून वीज खात्याच्या कर्मचार्याक मरण आयिल्लें. तेन्नाय कंत्राटदार कंपनीच्या अधिकार्यांनी हात वयर करपाचो यत्न केल्लो. उपरांत दाबोळी बोगमाळो खणपाचें काम करतना उदका पुरवण विभागाच्या अधिकार्यांक पयलीं कसल्योच सुचवण्यो दिवंक़ ना. हाका लागून दोन सुवातांचेर उदकाचीं पालपां फोडिल्लीं. हाका लागून लाखांनी लिटर उदकाची नासाडी जाल्ली. हे विशीं पुलीस कागाळ केल्ल्याचो विभागाच्या अभियंत्याचो दावो आसा. तशेंच उदकाची जी नासाडी जाली ताचे पयशे कोण भरतलो हो प्रस्न निर्माण जाला.
ह्या रस्त्याचेर खणपाचें काम करतना, मातयेची रास घालतना, येरादारी वळयतना कितेंय उपाय करपाक कंत्राटदारा कडेन जायना. सेगीत येरादारी वळयिल्ल्यान वाहन चालक आबूज जावन अपघात घडटात. ह्यान पयलीं व्हड खड्ड्यांत गाडी पडिल्ल्यान कांय उपाय केल्ले. तशेंच बुधवारा घडिल्लो अपघात हेच फाटभूंयेर घडला. हाका लागून कंत्राटदारान कसलेच उपाय करूंक ना हें स्पश्ट जालां.
मारूती जाधव बुधवारा रातीं सुमार १०-१०.३० मजगतीं दुचाकीन वतना व्हड खड्ड्या कडेन पावून तातूंत भितर पडलो. हाका लागून ताका मरण आयलें. खड्ड्या कडेन वचपी रस्त्या वटेन कांयच उबारूंक नाशिल्लें. हांगा उड्डाण पुलाचें काम सुरू जाल्ल्याक थंयचे लायटीचे खांबे काडिल्ल्यान हांगा सगल्याक काळोख आसता. खरें म्हळ्यार कंत्राटदारान हांगा रातच्या वेळार लायटीची वेवस्था करपाक जाय. मात हाचे कडेन आडनदर जाता. पावसाक लागून रातच्या वेळार वाहन चालकांक रस्त्याचो अदमास येना.
कंत्राटदारान बॅरिकेड्स उभारले उपरांत ताचेर तांबड्या दिव्यांचे माळेची वेवस्था करपाची गरज आसा. जाका लागून वाहन चालकांक हांगच्या रस्त्याची कल्पना येतली. आतां फुडाराक तरी हे गजालीं कडेन ते लक्ष दितले काय. जाका लागून वाहन चालकांक रस्त्यांची कल्पना येतली.हो प्रस्न आतां हांगा उप्रासला.
मजगतीं, ह्या प्रकरणाची दखल घेतना गोवा कॅनान कंत्राटदाराच्या निश्काळजीपणाक लागून हुस्को उक्तावन ताचे आड कारवाय करपाची गरज उक्तायल्या.
हे विशीं दक्षीण गोंयचे जिल्लोधिकारी इग्ना क्लिट्स हांकां लेखी कळयिल्ल्याचें गोवा कॅननान म्हणलें. उड्डाण पुलाच्या बांदकाम सुवातेचेर अशे अपघात जावचे न्हय म्हणून राष्ट्रीय महामार्ग प्राधिकरण, रस्ते येरादारी आनी महामार्ग मंत्रालय अधिकार्यांची बेगोबेग बसका आपोवची अशी मागणी केल्या. ह्या उड्डाण पुलाच्या कंत्राटदारान बांधकामाचे सुवातेर रस्तो सुरक्षा चिन्नां तशेंच बॅरिकेड्स उबारूंक नाशिल्ल्या संबंदी जिल्लोधिकारी कार्यालयाक सष्टेंबर २०२४ त म्हायती दिल्ली, अशें स्पश्ट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
