भांगरभूंय | प्रतिनिधी
80 टक्के दुकानां बेकायदो आशिल्ल्याचें उक्ताडार
भांगरभूंय । प्रतिनिधी
मुरगांवः नीज गोंयकार फौज हे बिगर सरकारी संस्थेचे कागाळे वयल्यान चिखली पंचायत, अन्न आनी वखदां संचालनालय, वजन माप खातें आनी भलायकी खातें हांणी जोडपालवान दाबोळेच्या साबार दुकानांचेर धाड घातली. ह्या वेळार तांणी वेगवेगळे फूड स्टॉल्स, चिकन मटण स्टॉल्स, फास्ट फूड आनी हेर दुकानांची पळोवणी केली. खूबशा दुकानां कडेन परवाने नाशिल्ल्याचें तांकां ह्या वेळार दिसलें. तशेंच स्टॉल वाठारांत घाणीचें साम्राज्य पातळिल्लें दिसलें. त्या दुकान धनयांचेर कारवाय करिनासतना परवानो काडपाचो आदेश दिला. तशेंच तांकां नोटीस जारी केल्या. नीज गोंयकार फौज हे संस्थेन चिखली पंचायतींत वचून दाबोळी वाठारांत जो चिखली पंचायतींत येता थंय बेकायदो दुकानां घालून बेकायदो वेवसाय सुरू केल्ल्याचें पंचायत सचिवाचे नदरेक हाडून दिल्लें आनी कागाळ नोंद केल्ली. ते कागाळे वयल्यान 24 ऑगस्टाक चिखली पंचायत, अन्न आनी वखदां संचालनालय, वजन आनी माप खातें, भलायकी खातें आनी नीज गोंयकार फौज संस्थेचे सुरेश नायक आनी हेरांनी मेळून दाबोळी वाठारांतल्या कांय दुकानांचेर धाड घातिल्ली.
चडशीं बेकायदो दुकानां पंचांचे कृपेनः सुरेश नायक
चिखली पंचायत, अन्न आनी वखदां संचालनालय, वजन आनी माप खातें, भलायकी खातें आनी नीज गोंयकार फौज संस्थेन दाबोळी वाठारांत केल्ले पळोवणेंत 80 टक्के दुकानां बेकायदो आशिल्ल्याचें स्पश्ट जालां. हे दुकानकार दिसाक लाखांनी रुपयांचो वेवसाय करतात, मात पंचायतीचे तिजोरेंत तांचो एक पयसोय जमा जायना. चिखली पंचायत वाठारांत 90 टक्के बेकायदो दुकानां चिखली पंच, सरपंच हांचे कृपेन सुरू केल्यांत. तातूंतलीं 80 टक्के परस अदीक दुकानां बिगर गोंयकारांचीं आसात. आदल्या पंचायत मंडळान त्या दुकानकारांक आलाशिरो दिला, अशें सुरेश नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
