दाबोळेचो बेकायदेशीर बांधकामां विशींचो मुद्दो परत आयलो मुखार
भांगरभूंय | प्रतिनिधी
बेकायदेशीर बांदकामां आडोवपाची मागणी
वास्कोः दाबोळी आंतरराष्ट्रीय विमानतळाच्या फनेल झोनांत सुरू आशिल्ल्या बेकायदेशीर बांधकामां विशींचो मुद्दो फाटलीं कितलींशींच वर्सां जालीं गाजता. ह्या वाठारांतलीं बेकायदेशीर कामां आडावपाची मागणी ह्यान पयलीय केल्ली. मात आतां हो विशय परत मुखार आयला. हांगच्या नागरिकांनी आनी ऑल गोवा एक्स्कॅव्हेटर ओनर्स असोसिएशन (AGEOA) च्या कार्यकर्त्यांनी सरळ प्रधानमंत्री कार्यालयाक (PMO) पत्र बरोवन दाबोळी गोवा आंतरराष्ट्रीय विमानतळाच्या फनेल झोनांत सुरू आशिल्लीं बेकायदेशीर बांदकामां आडोवपाची मागणी केल्या.
फनेल झोन म्हणल्यार विमानतळाच्यो धांवपट्ट्यो आनी प्रवेश मार्गा भोवतणचो हवाई वाठार. टेक-ऑफ आनी लँडिंग मजगतींच्या विमानतळा भोवतणची उड्डाणची सुरक्षितता सुनिश्चीत करपा खातीर हो झोन असता. ह्या ’फनेल झोन’ त म्हणल्यार ’विमानांच्या यो-वच करपी मार्गांत एकूय उंच इमारत नासतली,’ हाचेर भारतीय विमानतळ प्राधिकरणाचे (एएआय) खर नेम आसात.
मजगतीं, दाबोळेच्या नागरिकांचो असो दावो आसा, ह्या विमानतळाच्या फनेल झोनांत जर बांधकामां आनी निवासी इमारती उब्यो रावल्यार, भौशीक सुरक्षा आनी उड्डाण ऑपरेशन्स दोगांकूय धोको निर्माण जातलो.
हे विशीं उलयतना AGEOAचे अध्यक्ष अविनाश भोबे हांणी, काम बंद करपाचो आदेश आसून लेगीत अधिकारी दिल्लीक रावपी एका व्हड मनशाच्या नेतृत्वाखाला सुरू आशिल्ल्या बांधकामाक फाटबळ दितात. आमी जायते फावटीं बेकायदेशीर गजालीं कडेन लक्ष शासनाचें ओडलां, अधिकार्यां पत्रांय बरयल्यांत. हाचेर कारवाय म्हणून प्रशासनान काम बंद करपाचे आदेशूय दिल्यात. मात प्रकल्पांतले कांय मनीस अधिकार्यांक मेळटात आनी रोखडेंच हे काम बंद करपाचे आदेश रद्द करतात. आतां हाचेर निमाण उपाय म्हणून, आमी पंतप्रधान कार्यालय, केंद्रीय विमान वाहतूक मंत्रालय, गृह मंत्रालय आनी हेर संबंदीत अधिकार्यां कडेन संपर्क केलो.
जनहित याचिका दाखल करतले
पयल्या टप्प्यांत १२० चौरस मिटरचे ३२० भूखंडावर बांधकामां जावपाचीं आशिल्ल्यान हाका लागून कोयर समस्या, प्रदुशणा सारक्यो समस्या निर्माण जातल्यो. दर फावटीं जेन्ना आमी आक्षेप घेतात तेन्ना अधिकारी आमकां शांत करपा खातीर काम बंद दवरपाचे आदेश जारी करतात. मात प्रत्यक्षांत मात साईटीचेर मशीनरीचो आंकडो दर फावटीं वाडतूच आसा. हाका लागूनच आतां आमी जनहीत याचिका दाखल करतले अशें AGEOA चे अध्यक्ष अविनाश भोबे हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
