भांगरभूंय | प्रतिनिधी
…तशेंच जावं. कारण दाबोळेचेर हजारांनी लोक प्रत्यक्ष, अप्रत्यक्ष अवलंबून आसात.
दाबोळी विमानतळ वापराविणें उरतलो, अशें मोपा विमानतळ सुरू जावचे पयलीं विरोधक म्हणटाले. उपरांत सरकार पक्षान जाहीर सुवाळ्यांनी 7- 8 फावटी तरी हें न्हयकारलें. आयजूय ते ना म्हणटात. मात, विरोधी आमदार विजय सरदेसाय, खासदार कॅप्टन विरियातो फर्नांडीस हांणी ‘राष्ट्रीय सुरक्षेच्या नांवा खाला केंद्र सरकार आनी नौदल दाबोळी ताब्यांत घेवंक सोदता’, असो दुबाव उक्तायला. सात दिसां भितर हे विशीं अधिकृत स्पश्टीकरण येना जाल्यार आंदोलनाची शिटकावणी तांणी दिल्या. दुसरे वटेन ‘दाबोळी विमानतळ बंद जावचो, हे खातीर जीएमआर कंपनीचें लाॅबींग चलता. हो विमानतळ नौदलान ताब्यांत घेवचो, हे खातीर ते दिल्लीचेर चेपण हाडटात’, अशें येरादारी मंत्री माॅवीन गुदिन्हो हांणी उक्तें केलें. इतले दीस आस्वासनांच्या वासार दवरिल्ल्या वेवसायिकांच्या तोंडाक पानां पुसपा सारको हो प्रकार, अश्या तरेच्यो प्रतिक्रिया सोशल मिडियाचेर येवपाक लागल्यात. दाबोळेचे हे बातमेक लागून वास्को आनी आशिकुशीच्या वेवसायिकांच्या पोटांत कुळकुळ्ळां, अशें म्हणल्यार अतिताय थारची ना.
‘दाबोळी विमानतळ कशेच बंद करचे नात, हें आस्वासन संरक्षण मंत्री राजनाथ सिंह हांणी दिलां’, अशें मंत्री गुदिन्हो हांणी सांगलां. तशेंच जावं. कारण दाबोळेचेर हजारांनी लोक प्रत्यक्ष- अप्रत्यक्ष अवलंबून आसात. हाॅटेलां, रिसाॅर्टस, टॅक्सीकार, टूर आॅपरेटर्स, लग्न सुवाळे, काॅर्पोरेट कार्यावळी, विमानतळ कर्मचारी, कॅटरींग, सुरक्षा वेवस्था, दुकानां, लघुउद्देजक, वेपाऱ्यांचेर परिणाम जातलो. कार्गो बंद जाल्यार वखदां, फुलां, हेर उत्पादनांचे आयात, निर्गतीक मार बसतलो. भायर वचप्यांक चड दुडू, वेळ, पेट्रोल खर्च करून मोपा वच्चें पडटलें. दाबोळी विमानतळ बंद जाल्यार दक्षीण गोंयचे अर्थवेवस्थेक धपको बसतलो. गुंतवणूक, बाजारपेठेचेर परिणाम जावं येता. मात, हाचो मोपा, सरभोंवतणचो वाठार, एकूणच उत्तर गोंयाक खूब फायदो जातलो. दाबोळे सात प्रवाशांची खाजगी विमानसेवा सुरू करूं येता. गोंय आनी हेर कडल्या उद्देजक, फुडाऱ्यांक ती फायद्याची थारतली.
जाणकारांच्या मतान, दाबोळे परस मोपा विमानतळार ऐसपयस जागो आसा. दाबोळेचेर थळावीं 44,991 तर आंतरराष्ट्रीय 3204 विमान उड्डाणां जातात. सादारण 73 ते 75 लाख प्रवाशी येतात, अशें सरकारी आंकडे सांगतात. अर्थांत ताजो आंकडो वेगळो आसतलो. कारण कांय विमान कंपनीं मोपाच्या मोगांत पडल्यात. आमदार सरदेसाय हांणी दाबोळे विशीं दुबाव उक्तायतकच, मंत्री गुदिन्हो हांणी ‘आमी विमानतळ बंद जावचो न्हय, म्हूण केंद्र सरकाराक सांगपाक गेल्ले. तांणी तो बंद करचे नात,’ अशें आस्वासन दिलां, अशें जाहीर केलें. जीएमआर कंपनी लाॅबींग करता, अशें सांगून तांणी आपल्या कोर्टांतलो बाॅल भायर धुकल्लो खरो, पूण दिल्लींतल्यान खासदार कॅप्टन विरियातो हांणी ‘विमानतळ बंद करचो न्हय, अशी विनवणी करपाक गोंयचे लोकप्रतिनिधी दिल्ली येवंक नाशिल्ले, तर विमानतळ बंद करतात, अशें तांकां सांगपाक आपयिल्ले’, असो दावो केलो. खासदार सांगतात, तें खरें काय फट तें रोखडेंच कळटलें. मात ह्या प्रकरणांत सगलें कितें पारदर्शक पद्दतीन जालें ना जाल्यार आनीक एका आंदोलनाचें तोंड फुट्टलें. विमान कंपनींकूय मोपा वटेन वळपाक निमित्त मेळूं येता.
विधानसभेंत दाबोळेचेर भासाभास जाली तेन्ना, ताचो विस्तार जातलो. सुदारणा जातली, अशी म्हायती दिल्ली. वेवसायीक आनी म्हालवाहू विमानां खातीर तो उक्तो उरतलो, अशेंय म्हणिल्लें. कांय वर्सां पयलीं नौदलाच्या अधिकाऱ्यान हो विमानतळ फक्त नौदला खातीर दवरचो, अशें पत्र केंद्र सरकाराक बरयिल्लें खंय. आतांय दाबोळेची चर्चा सुरू जाल्ली आसली तरी, निमाणो निर्णय अजून केंद्र सरकारान जाहीर करूंक ना. दक्षीण गोंयांतले उद्देजक, वेवसायीक, प्रवासी हांकां बरी बातमी मेळटली, अशी आस्त बाळगुया.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
