भांगरभूंय | प्रतिनिधी
भांगरभूंय । प्रतिनिधी
वास्कोः दाबोळी विमानतळ वाठारांतल्या ‘फनेल झोना’त आशिल्ली कांय बांदकामां मुरगांव उदरगत आनी नियोजन प्राधिकरणान (एमपीडीए) मुंबय उच्च न्यायालयाच्या गोंय खंडपिठाच्या आदेशा प्रमाण शुक्राराक मोडलीं. हेर बांदकामां मोडटले. ताका लागून थंय रावपी लोकां मदीं भिरांत पातळ्ळ्या. घरां वाटावपाक कसली तरी वाट काडची अशी विनवणी तांणी गोंय सरकाराक केल्या.
फनेल झोन म्हणून जाहीर करचे पयलीं बऱ्याच जाणांनी थंय जमनी विकत्यो घेवन घरां बांदल्ली. आमचे कडेन बांदकामां संबंदीची सगळीं कागदपत्रां आनी परवाने आसात. पंधरा वर्सां उपरांत आतां हीं बांदकामा कित्याक मोडटात असो प्रश्न कांय जाणांनी विचारला. आमकां दुसरे कडेन जागो दिल्यार आमी थंय वचपाक तयार आसात अशें कांय जाणांनी सांगलें.
फनेल झोनांतलीं कांय बांदकामा हाचे पयलीं मोडल्ली. शुक्राराक (16 फेब्रुवारी) आनीक कांय बांदकामां मोडपाक मुरगांव उदरगत आनी नियोजन प्राधिकरणाचे अधिकारी येतले अशी कुणकुण लागल्ल्यान थंय रावपी लोक कामाक वचनासता घराच रावल्ले. प्राधिकरणाच्या अधिकाऱ्यांनी न्यायालयाच्या आदेशा प्रमाण बांदकामाचोक कांय वांटो मोडलो. आमी न्यायालयाच्या आदेशा प्रमाण कारवाय केल्या. संबंदितांनी आपल्या बांदकामाची उंची निर्धारीत उंच्या परस चड केल्ल्यान ही कारवाय करची पडली अशें एका अधिकाऱ्यान सांगलें.
प्राधिकरणान आतां मेरेन इकरा बांदकामां आड कारवाय केल्या. आमी इतलीं वर्सा हांगा रावतात तेन्ना कोणेच कसलीच कारवाय करूं ना आतांच ही कारवाय कित्याक अशें लोकांनी अधिकाऱ्यांक विचारलें. आमचे कडेन सेल डीड, वीज आनी उदकाची बिलां, मुरगांव उदरगत आनी नियोजन प्राधिकरण, पंचायतीन दिल्ले परवाने आसात अशें तांणी सांगलें. फनेल झोनांत कांय कडेन घरां परस उंच लायटीचे खांबे आसात अशें तांणी सांगलें. बँकां कडल्यान रीण घेवंन, भांगर घाण दवोरून आमी घरां बांदल्यांत, ती मोडल्यार आमी खंय वचप अशें लोक अधिकाऱ्यांक विचारतना दिसताले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
