भांगरभूंय | प्रतिनिधी
भांगरभूंय । प्रतिनिधी
मुरगांवः दाबोळी विमानतळाकडल्या फ्लायओव्हराच्या ग्रेड सॅपरेटराच्या खांब्यार वचून बशिल्ले बायलेक वास्कोच्या उजो पालोवपी दलाच्या जवानांनी निमाणे सकल देंवयलें. ही बायल त्या खांब्यार कशी पावली, होच प्रश्न लोकांक पडिल्लो. मंगळारा दीसभर हे बायलेचो व्हिडिओ व्हायरल जाल्लो.
ही बायल ग्रेड सॅपरेटरच्या खांब्यार बशिल्ली मंगळारा सकाळीं कांय टॅक्सीवाल्यांक दिसलें. ताणी ताची म्हायती वास्को पुलीस आनी वास्कोच्या उजो पालोवपी कार्यालयाक दिली. उजो पालोवपी दलाच्या जवानांनी निसण लायले उपरांत ते बायलेक सकल देंवपाक सांगलें. तिचेकडेन चवकशी केली. आपूण कारवारची आनी आपलें नांव स्नेहा नायक अशें तिणे सांगलें. काम दितां अशें सांगून कोणे तरी आपल्याक हांगा हाडून सोडले. आपले कडेन आशिल्ले पयशे तांणी काडून व्हेलें अशें तिणे सांगलें. मात पुलाच्या खांब्यार कशी चडली हें मात तिणे सांगलें ना. वास्को पुलिसांनी ते विशीं चवकशी सुरू केल्या.
वास्को पुलिसांनी दिल्ले म्हायती प्रमाण तिगेल्या कारवारच्या घरच्यांनी तिका थंय धाडनाकात अशें सांगिल्ल्याची म्हायती दिली. मंगळारा सांजे पुलिसांनी तिका मनोरुग्ण हॉस्पिटलांत उपचारा खातीर दाखल केलें. उपनिरीक्षक मयूर सावंत हांणी स्नेहा नायकाच्या कारवारच्या घरच्यांक फोन करून ताका येवून व्हरात अशें सांगलें. मात तांणी न्हयकार दिलो. ताणे परत परत फोन करून तांका समजोवपाचो यत्न केलो मात तो निर्फळ थारलो.
फ्लायओव्हराच्या सकयल्ल्ये पोकळे सुवातेरकडेन वचपा खातीर आशिल्ल्या मेनहोलांतल्या ही बायल ग्रेड सेपरेटरामेरन पावपाची शक्यताय आसा. हो मेनहोल बंद करपाची गरज आसा. ह्या मेनहोलाक लागून फ्लायओव्हर अनैतिकपणा करपाची सुवात जावपाची भिरांत एका टॅक्सीवाल्यांक उक्तायल्या. मजगतीं ते बायलेक सकल देंवयतात हें पळोवपाक लोकांनी व्हडा प्रमाणात गर्दी केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
