दाबोळी-बोगमाळो चौकांत येरादारीची कोंयडी

भांगरभूंय | प्रतिनिधी

वास्कोः दाबोळी-बोगमाळो चौकांत फ्लायओव्हर बांदपा खातीर येरादारी वेवस्थेंत सातत्यान बदल जाल्ल्यान ड्रायव्हरां मदीं गोंदळ जाला. येरादारी वेवस्थेंत बदल करतना बदलांची आदींच सुचोवणी दिवपा खातीर नोटीस बोर्ड उबारपाची गरज आसा. पूण संबंदीत अधिकारी ते गजाली कडेन आडनदर करतात. हो फ्लायओव्हर बांदपाक विरोध ना. पूण येरादारी वेवस्था वेवस्थीत उरची हे खातीर लक्ष दिवपाची गरज आसा.

फ्लायओव्हर खांबे बांदपा खातीर दाबोळी-बोगमाळो चौकांत येरादारी सिग्ल काडून उडयल्या उपरांत थंय राम भरोसे येरादारी सुरू जाल्या. बोगमाळो सावन येवपी वाहनां एमईएस चौकांत येवपा खातीर बदल केला. अजूनय जायते जाण पोरन्या रस्त्यार आपलीं वाहनां व्हरतात. देखून बोगमाळोक पावप कठीण. हायवेचेर घुंवपी वाहन चालकांक आडमेळीं निर्माण करपाक लागल्यात. थंय केन्ना केन्नाय येरादारी पुलीस तैनात आसतात.

पूण येरादारी नेम मोडपी लोकांक तालांव दिवपाचो अधिकार नाशिल्ल्यान ते ओगी रावतात.

शेनवारा (19 तारखेक) थंयच्या चौकांत परतून बदल केला. येरादारी बदलतना बॅरिकेड्स लावपा बथला थंय फकत प्लास्टीकचीं पट्ट्यो दवरतात. येरादारी वेवस्थेंत बदल करपा संबंदी कसलोच बोर्ड ना. हाका लागून बोगमाळो कडेन वचपी वाहन चालकां मदीं गोंदळ जाला. थंय येरादारी पुलीस नात.

बोगमाळो कडेन वचपी वाहनांक हायवेचेर आशिल्लीं वाहनां थांब मेरेन मोडणाचेर वाट पळोवची पडटा. हाका लागून हेर वाहनांक आडमेळीं येवपाक लागल्यात. अशे स्थितींत थंयच्या येरादारी वेवस्थेंत सुसुत्रता हाडपा खातीर जनतायेचे उपाय करपाची गरज आसा.