भांगरभूंय | प्रतिनिधी
भांगरभूंय । प्रतिनिधी
वास्कोः दाबोळी विमानतळाचें 250 कोटी रुपये खर्च करून विस्तारीकरण चल्लां. दोन विमानां उबीं करपाक मेळचीं म्हणून दोन ऍरब्रीज बांदतले. हेर सुविधा तयार करतले. हाका लागून दाबोळी विमानतळ बंद जातल्यो ह्यो फकत वावड्यो आसात आनी तातूंत कांय तथ्य ना अशें दाबोळीचो आमदार आनी पंचायत मंत्री मावीन गुदिन्हो हांणी शुक्रारा सांगलें.
दक्षीण पश्चीम रेल्वेन दाबोळी विमानतळ चौकांत रेल्वे पुलार बांदल्ल्या रस्त्याच्या दुसऱ्या लेनीचे काम पुराय जाल्ल्यान गुदिन्हो हाचे हस्तुकीं ताचें उक्तावण जाले. त्या वेळार ते उलयताले. दाबोळी विमानतळ बंद जातलो अश्यो वावड्यो उठयतात तांकां ताणी ह्या वेळार लक्ष्य केलें. विमानतळ वाठारांतली प्रशासकीय इमारत मोडून विमानतळाचें विस्तारीकरण करतले. दोन ऍरब्रिज बांदतले. प्रशासनाचें काम सध्या वापरांत नाशिल्ल्या पार्कींग इमारतींतल्यान चलतलो अशें तांणी सांगलें.
दक्षीण पश्चीम रेल्वे कडल्यान आमकां पुराय सहकार्य मेळटा. फ्लाय ओव्हर बांदतना रेल्वेन एक अंतर्गत रस्तोय बांदून दिला. शांतीनगर हांगा पोरण्या पुलाक समांतर असो नवो पूल बांदपाक सुरवात जाल्या आनी आठ म्हयन्यांत तें काम पुराय जातलें. पुलाचें बांदकाम करतना उदका पायपलायन दुसरे कडेन व्हरतले. फुडाराक शांतीनगर आनी नवें वाडें वाठारांतल्या लोकांची गैरसोय पयस जातली अशें गुदिन्होन सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
