भांगरभूंय | प्रतिनिधी
पणजी : दाबोळी विमानतळा आड जीएमआर कंपनीचें लॉबिंग चालू आसा. दाबोळी विमानतळ नौदळान ताब्यांत घेवचो म्हूण ते दिल्ली चेंपण हाडटात. हाका लागून हांवें खासदारा सयत दिल्लीक संरक्षण मंत्री राजनाथ सिंह हांची भेट घेतली. दाबोळी विमानतळ केन्नाच बंद जावचो ना, हाची म्हाका खात्री आसा, अशें येरादारी मंत्री मॉविन गुदिन्हो हांणी स्पश्ट केलां.
आमदार विजय सरदेसाय हांकां पुराय विशय खबर ना. देखून तांणी म्हज्या राजीनाम्याची मागणी केल्या, अशें गुदिन्हो हांणी म्हणलां.
दाबोळी विमानतळ बंद जातलो, अशी चर्चा राज्यांत सुरू जाल्या. दाबोळी विमानतळ नौदळ ताब्यांत घेवपाक सोदता. हे विशीं सरकारान ७ दिसांत स्पश्टीकरण दिलेंना जाल्यार आंदोलन करपाची शिटकावणी गोवा फॉरवर्डाचे आमदार विजय सरदेसाय हांणी दिल्या. हाचे उपरांत कॉंग्रेस विधीमंडळ फुडारी युरी आलेमांव आनी प्रदेश अध्यक्ष अमित पाटकार हांणी लेगीत दाबोळी विमानतळाची हुस्को उक्तायला.
हे फांटभुयेर उलयतना मंत्री गुदिन्हो हांणी हें स्पश्टीकरण केलें. दाबोळी विमानतळ नौदळान ताब्यांत घेवचो म्हूण जीएमआर कंपनी चेंपण हाडटा. ही गजाल कळ्ळ्या उपरांत मुख्यमंत्री डॉ. प्रमोद सावंत हांचे सयत हांवें बेगोबेग संरक्षण मंत्री राजनाथ सिंह हांची भेट घेवन चर्चा केली. हाचे उपरांत दिल्लीक खासदार सदानंद शेट तानावडे हांचे सयत परत तांची भेट घेवन हांवें निवेदन भेटयलें. दाबोळी विमानतळ नौदळ ताब्यांत घेवचो ना. ताचेर विमान येरादारी सुरूच उरतली, अशें आश्वासन संरक्षण त्र्यांन दिलां. म्हणटकच दाबोळी विशीं सगल्यांनी निश्चिंत रावचें, अशें गुदिन्हो हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
