भांगरभूंय | प्रतिनिधी
भांगरभूंय । प्रतिनिधी
पणजीः दोबोळी विमानतळ तशेंच त्या वाठारांतले उदरगती खातीर सरकारान 317 कोटी रुपयांचीं कामां हातांत घेतल्यात. हातूंत टर्मिनस इमारतीचें विस्तारीकरण करपाचें काम हातांत घेतलां आनी नवी पार्किंग सुविधा तयार केल्या, अशी म्हायती नागरी उड्डाण मंत्री डॉ प्रमोद सावंत हांणी विधानसभेचे लेखी जापेंत दिली.
दाबोळी आंतरराष्ट्रीय विमानतळाचेर मुळाव्यो साधनसुविधा उबारपा संबंदीत कसलीं पावलां उखल्ल्यांत हाचे तपशील मुरगांवचे आमदार संकल्प आमोणकार हांणी मागिल्ले. नागरी उड्डाण मंत्र्यान हे सगळे तपशील विधानसभेच्या पटलार दवरल्यात.
दोबोळी विमानतळार फावो त्यो सुविधा दिवपा खातीर गोंय सरकारान सगळी गरजेची मजत दिल्या. हातूंत येरादारेची कोंयडी उणी करपा खातीर नवे टर्मिनल इमारती लागसार दोन वर्सां पयलीं ग्रेड सेपरेटर बांदपाचो आस्पाव आसा. ह्या प्रकल्पांत राष्ट्रीय महामार्ग 17 ब हाचेर दोन उड्डाण पूल आसात. एक उड्डाण पूल वेर्णा वटेन 710 मिटर आनी दुसरो उड्डाण पूल वास्को वटेन 579 मिटर आसा. वट्ट 1,289 मिटर लांबायचे दोनूय उडडाण पूल 38.52 कोटी रुपया खर्च करून बांदल्यात.
ह्या ग्रेड सेपरेटरांक लागून टर्मिनल इमारती कडेन प्रवाशांची येरादारी सोयीची जाल्या. ते भायर सीआयएसएफ बॅरेक आनी भारतीय विमानतळ प्रधिकरण कर्मचारी कॉलनी बांदपा खातीर सरकारान जमीन संपादीत केल्या. फुडाराक लेगीत भारतीय विमानतळ प्राधिकरणा कडल्यान गरजेची मागणी वा प्रस्ताव आयले जाल्यार आपले मर्यादे भितर शक्य आसा तितली मजत गोंय सरकार करतलें. 7 फेब्रुवारी 2020 त 143.66 कोटी रुपया खर्रच करून दाबोळी विमानतळाचेर समान टॅक्सी ट्रॅक बांदला. तशेंच विमानतळांत सिव्हील आनी लायटीचीं कामां हातांत घेतल्यांत. 25 ऑगस्ट 2022 त 2.83 कोटी रुपया खर्च करून पॉयंट 162 वरुणापुरी वटेनच्या ग्रेड सेपरेटर लागसार मोटारीं खातीर पार्कींग वेवस्था उबारल्या आनी 9 फेब्रुवारी 2024 त आयएनएस हंसा गेट दाबोळी वटेनच्या ग्रेड सेपरेटर लागसार 70 लाख रुपया खर्च करून मोटारीं खातीर पार्कींग बांदलां. सध्याचें दाबोळी विमानतळ टर्मिनस इमारतीचें विस्तारीकरणाचें काम चालू आसा. डिझायन आनी बिल्ड तत्वाचेर 132.69 कोटी रुपया खर्च करून हें काम हातांत घेतलां. हातूंत सध्याच्या टर्मिनलांत सिव्हील, यांत्रिकी, प्लंबींग, इलेक्ट्रीकल, उजो पालोवपी यंत्रणा, एचव्हीएसी, विमानतळ यंत्रणा, आयटी, फर्निचर आनी दिशा दाखोवपी तकट्यांची सुदारणा करप तशेंच हेर कामांचो आस्पाव आसा. ह्या कामां खातीर केंद्राचो कितलो निधी आयला हाची म्हायती गोंय नागरी उड्डण संचालनालया कडेन ना. हे फाटलें कारण म्हणल्यार विमानतळ भारतीय विमानतळ प्राधिकरण हांचे मालकीचो आनी तें नागरी उड्डाण मंत्रालया खाला येता, अशें जापेंत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
