भांगरभूंय | प्रतिनिधी
कॉलेजीत शिकतना दीना पाठकान सुटके झुजांत वांटो घेतिल्लो. ते खातीर तिका कॉलेजींतल्यान काडिल्ली. मागीर दुसऱ्या म्हाविद्यालयाक शिक्षण घेवन बी. ए. पदवी घेतली.
हिंदी सिनेमाच्या सुरुवातेच्या काळांत आवयची प्रतिमा म्हणल्यार त्यागाची देवी आनी आपुलकीची मूर्ती. पूण काळ फुडें सरकत गेलो तशी आवयचे प्रतिमेंत थोड्या प्रमाणात बदल घडत गेलो. आवयचें एक वेगळेंच रूप पड्ड्यार पळोवंक मेळ्ळें. आवयचे प्रतिमेंत बदल घडोवपाचें स्रय अभिनेत्री दिना पाठक हिका वता. कारण तिणें सिनेमांत एका बबली आवयची वळख करून दिल्ली, जी भुरग्यांमदीं फकत सुख-दुख्खाची वांटणी करना, तर हांसता आनी फकांडांय करता. तिणें अभिनय प्रतिभेच्या बळग्यार जायते व्हडल्या चरित्र कलाकारांक फांटी घाल्ले. फिल्मी कारकिर्दींत तिणें आज्जेची, आईची तर केन्ना सासुमायची भूमिका केली. बायलांनी सिनेमांत काम करुंक समाजीक विरोद आशिल्लो, त्या काळांत ती सिनेमांत आयली.
गुजराती रंगभूंयेक खाशेली वळख दिवपाक दिना पाठक हिगेलें वेगळांव नज अशें आंग आशिल्लें. कारण तिणें कारकिर्दीची सुरुवात गुजराती रंगमाचये वयल्यान केल्ली. नाटकांनी भूमिका करतकूच फुडें दिनान उसकी कहानी, सारा आकाश, सत्यकाम ह्या सारक्या चित्रपटांतल्यान कारकिर्दीक नव्यान आयाम दिलो. गुलजार हांगेल्या ‘मीरा’ चित्रपटांत राजा बिरामदेवाली राणी कुंवरबाईली भूमिका तिणें साकारली. केतन मेहताले ‘भवनी भवई’, ‘मिर्च मसाला’ आनी ‘होली’ सिनेमात काम केलें.
सईद अख्तर मिर्झा दिग्दर्शित ‘मोहन जोशी हाजीर हो’ सिनेमात मोहन जोशी हांगेल्या घरकान्नीची भूमिका साकारल्या. गोविंद निहलानीले ‘तमस’ हे गाजिल्ले दूरदर्शन माळेंत दिना पाठकान बंटोची भुमिका साकारल्या.
गुजराती सिनेमांत दिना पाठक लोकप्रीय अभिनेत्रीं मदल्यो एक आशिल्ल्यो. ‘उमराव जान’, ‘मोहन जोशी हाजीर हो’, ‘मिर्च मसाला’ आनी ‘कोशिश’ सारक्या चित्रपटांतल्या दमदार अभिनया खातीर त्यो अजूनय रसिकांच्या लक्षांत आसात. तिणें ‘कारीवर’ ह्या गुजराती चित्रपटांतल्यान पदार्पण केल्लें, पूण फकत एक सिनेमा केल्या उपरांत नाटकांत काम करपाक लागली. बऱ्याच वर्सां उपरांत तिणें ‘उसकी कहानी’, ‘सात हिंदुस्तानी’, ‘द गुरू’ आनी ‘सत्यकाम’ सारक्या चित्रपटांत काम केलें. कॉलेजीत शिकतना दीना पाठकान सुटके झुजांत वांटो घेतिल्लो. ते खातीर तिका कॉलेजींतल्यान काडिल्ली. मागीर दुसऱ्या म्हाविद्यालयाक शिक्षण घेवन बी. ए. पदवी घेतली. दीना पाठक 80 च्या दशकातल्या टिव्ही माळ ‘मालगुडी डेज’ दिसली. ‘पिंजर’ हो तिगेलो निमाणो सिनेमा.
1960 सावन चित्रपटांत काम करुन लेगीत दिनाक सादेपणान रावप आवडटालें. तिणें आपले चडशें जिवीत भाड्याच्या घरांत घालयल्लें, पूण निमाण्या दिसांनी एक घर विकत घेतलें. मुंबयतले गेटवे ऑफ इंडिया हांगां ‘श्रीमान’ नांवाचे कपडे शिवपी
दुकानदार बलदेव पाठका वांगडा दिनाचें लग्न जालें. राजेश खन्ना, दिलीप कुमार ह्या अभिनेत्या खातीर ते कपडे डिझायन करताले. राजेश खन्ना हांगेलो ‘गुरु कुर्ता’ची रचना बलदेव हांणीच केल्ली, म्हूण बलदेव स्वताक भारतांतलो पयलो डिझायनर म्हणटाले. राजेश खन्नाली कारकीर्द कावलांत आयली तेन्ना बलदेव हांगेल्या दुकानाचेर ताचो वायट परिणाम जावन दुकान बंद करचें पडलें. दिना हांच्यो दोनुय धुवो रत्ना पाठक- शाह आनी सुप्रिया पाठक ही अभिनयाच्या मळार सक्रीय आसात. रत्नाचे लग्न नसीरुद्दीन शाह आनी सुप्रियाचे लग्न पंकज कपूर वांगडा जालां.
दीना पाठक हांचो जल्म 4 मार्च 1922 दिसा मुंबय प्रेसिडेन्सींतल्या अमरेली हांगा जालो. 11 ऑक्टोबर 2002 दिसा मुंबयंत तिका मरण आयलें.
——————————-
सुदीन वि. कुर्डीकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
