भांगरभूंय | प्रतिनिधी
आंतरराष्ट्रीय हॉकी म्हासंघान जाहीर केल्ल्या ताज्या रॅंकिंगेंत भारताच्या दादल्यां हॉकी पंगड तिसरे सुवातेर पावलो. भारत मे 2022त पयल्या तिनांतल्यान भायर पडिल्लो. फाटल्या म्हयन्यांत भारतान आशियायी चॅम्पियन्स ट्रॉफी जिखिल्ली. ताचो फायदो भारताक रॅंकिंगेंत जालो. भारतान चॅम्पियन्स ट्रॉफींत सातांल्यो स मॅची जिखिल्ल्यो, जाल्यार एक मॅच बादाबाद उरिल्ली.
मजगतीं, युरो हॉकी सर्तीचे फायनलींत इंग्लंड पंगडाक नॅदरलॅण्डा आड हार घेवची पडली. ताका लागून इंग्लंड पयल्या तिनांतल्यान भायर पडलो. नॅदरलॅण्ड पयले सुवातेर आसा. बॅल्जियम दुसरे सुवातेर आसा. जर्मनी पांचवे आनी ऑस्ट्रेलिया सवे सुवातेर आसा. ते उपरांत अर्जेंटिना आनी स्पेन ह्या पंगडांचो क्रमांक लागता.
बायलांच्या गटांत लेगीत नॅदरलॅण्ड पयले सुवातेर आसा. ऑस्ट्रेलिया दुसरे आनी अर्जेंटिना तिसरे सुवातेर आसा. बॅल्जियम चवथे आनी जर्मनी पांचवे सुवातेर आसा. भारत एक सुवातेच्या फायद्या सयत सातवे सुवातेर पावलो. स्पेन आठवे, न्युझिलॅण्ड णववे आनी जपान धावे सुवातेर आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
