भांगरभूंय | प्रतिनिधी
नवी दिल्ली, खबरां संस्था ः जेएसीसी आशियांत (JACC Asia) उजवाडाक आयिल्ल्या संशोधन अहवालांत, बायलां आनी दादल्यांच्या काळजाच्या दुयेंसांची तपासणी जाली. डिप्रेशनान आशिल्ल्या दादल्यांक काळजाच्या दुयेंसांचो धोको १.३९% आनी बायलांक १.६४% आशिल्ल्याचें दिसून आयलें. इतलेंच न्हय तर दादल्यांपरस बायलांक स्ट्रोक, काळजाचें दुयेंस, मायोकार्डियल इन्फेक्शन, एंजिना पॅक्टोरिस आनी ॲट्रियल फायब्रिलेशनचा धोकोय चड आशिल्ल्याचे दिसून आयलें.
बायलांक डिप्रेशनाचो चड त्रास कित्याक: तज्ञांच्या मतान बायलांच्या आयुशांत जायते बदल जातात. गुरवारपणा सावन निवृत्ती मेरेन सगळ्यां समस्यांक तांका तोंड दिवचें पडटा. तशेंच ते जायत्या हार्मोनल बदलांतल्यान वतात. हाका लागून तांकां डिप्रेशन येवपाची शक्यताय आसता. कारण सायटोकाइन सारकिल्ले धोक्याचे हार्मोन काळजाचेर परिणाम करतात. बायलां आवय जातात, कांय भुरग्यांची जतनाय घेतात तेन्ना तांकां आपूण आतां कांयच करपाक सक्षम ना अशें दिसपाक लागता. ताका पोस्टपर्टम डिप्रेशन अशेंय म्हण्टात. हाका लागून बायलांक डिप्रेशन येता. तांकां ताण येता, चिडचिडेपण येता आनी राग येता. सुमार ५०-६० टक्के बायलांक मदीं हें अशें घडटा.
डब्ल्यूएचओच्या अहवाला प्रमाण संवसारांतले सुमार 30 कोटी लोक सध्या डिप्रेशनाचो त्रास सोंसतात. दादल्यांपरस बायलांमदीं डिप्रेशनाचे प्रमाण 50% चड दिसून येता. तातूंतले 10 टक्क्यां परस चड गुरवारी बायलो आनी आताच भुरग्यांक जल्म दिल्ल्याचो आस्पाव आसा. दर वर्सा 7 लाखां परस चड लोक डिप्रेशनाक लागून आत्महत्या करतात. भारतांतय ही समस्या नेटान वाडत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
