दादल्यां परस बायलांक चड ताण

भांगरभूंय | प्रतिनिधी

युवरदोस्त मानसीक भलायकेचें सर्वेक्षण

नवी दिल्ली, खबरां संस्था ः आयचे पिळगेंत लोकांक चड अपेक्षा आसतात, जीं केन्ना केन्ना तांकां ताण दिवपी थारता. जाल्यार वायट आनी अस्वस्थ जिणेपद्दतीक लागूनय ताण निर्माण जाता. दादले आसूं वा बायलो, दरेकल्याक ताणाची ही समस्या आसता. पूण हेर शारिरीक समस्यां वांगडाच बायलांक दादल्या परस चड ताण येता.

दादल्यां परस बायलांक चड ताण

हालींच देशांतल्या कर्मचाऱ्यांच्या भावनीक निरोगीपणाचे स्थितीचेर युवरदोस्त (Yourdost) मानसीक भलायकेचें सर्वेक्षण केलां, ताचे प्रमाण भारतांतल्या बायलांक दादल्यां परस चड ताण आसता अशें दिसून आयलां. वट्ट पांच हजार लोकांचेर हें सर्वेक्षण केले. ताचे प्रमाण ऑफिसांत काम करपी बायलांक दादल्यां परस चड ताण आसता. बायलांक ताण संबंदीत कांय प्रस्न विचारले, तातूंत 72.2 टक्के बायलांक ताणाची समस्या आशिल्ल्याचे स्पश्ट जाले. जाल्यार तेच प्रस्न दादल्यांक विचारले तेन्ना हो आंकडो 53.64 टक्के आशिल्लो.

बायलांक ताण येवपाचीं कारणां…

बायलांक ताण येवपाक जायतीं कारणां जापसालदार आसूं येतात. जायते फावटीं कुटुंबीक समस्याय हाका जापसालदार आसता.
केन्ना केन्ना बायलांक चिंता आनी नकारात्मकतायेक लागून ताण चड येता.
बायलांक केन्ना केन्ना भुरग्यांक लागून चिडचिडेपण सारकिल्ली समस्या जाता, जाका लागून ताण आनी चिंता निर्माण जावंक शकता.

बायलांनी ताण कसो टाळचो?

ताण उणो करपाखातीर नेमान योग आनी प्राणायम करचो.
ताणांतल्यान पयस रावपा खातीर बायलांनी खावपाची संवय निरोगी दवरची.
खंयच्याय गजाली विशीं चड विचार करुंक फावना.
तुमकां खंयच्याय तरेचो ताण येता जाल्यार तुमच्या कुटुंबाक वा इश्टां कडेन तुमचे प्रस्न, समस्या शॅर करात.