भांगरभूंय | प्रतिनिधी
पणजीः भलायकी खातें आनी संगथ एनजीओ हांच्या जोड पालवान मानसीक भलायकी बरी उरपा खातीर ‘इम्प्रेस’ हो उपक्रम सुरू केला. ते प्रमामण 540 जाणांक निरशेणेंतल्यान (डिप्रेशनांतल्यान) भायर काडपा खातीर समुपदेशन दिले. ह्या 540 दुयेंतींतले 371 म्हळ्यार 68.71 टक्के बायलां आनी 169 दादले (31.3 टक्के) आशिल्ले. पिरायेच्या गटा प्रमाण 45 ते 54 वर्सां पिरायेच्या (दादले आनी बायलां) गटांतल्या 21.7 टक्के दुयेंतींक समुपदेशन केले.
‘इम्प्रेस’ खाला भलायकी खातें गोंयांत प्राथमीक पांवड्यार मानसीक भलायकेची जतनाय घेवपाचो यत्न करता. हातूंत गोंयांतल्या प्राथमीक भलायकी केंद्रांतल्या वेंचून काडिल्ल्या कर्मचाऱ्यांक मानसीक भलायकी, समुपदेशन आदी विशीं व्यापक प्रशिक्षण दिवपाचें काम सुरू आसा. अशें प्रशिक्षीत कर्मचारी भलायकी केंद्रांत येवपी दुयेंतींक समुपदेशन दितात. आतां मेरेन प्राथमीक भलायकी केंद्रांतल्या 87 भलायकी कर्मचाऱ्यांक मानसीक दुयेंसांतल्यान भायर पडपा खातीर समुपदेशन दिवपा खातीर प्रशिक्षण दिलां.
ह्या कार्यावळी खाला 74 हजार 525 दुयेंतींची मानसीक भलायकेच्या समस्यांची तपासणी पयलींच जाल्या. तातूंतले 10 टक्के म्हळ्यार सुमार 7,452 लोक निरशणेन पिडीत आशिल्ले. तांकां सगळ्यांक समुपदेशन केला. पूण तातूंतल्या फकत 540 जाणांनी लिंग, पिराय अशी आपली म्हायती नोंद करपाक मान्यताय दिली. हेर दुयेंती ही म्हायती गुपीत दवरपाक पसंत करतात अशें संगथ एनजीओच्या प्रकल्प मुखेल्यानी सांगलें.
हे विशीं भलायकी मंत्री विश्वजीत राणे हांणी सोशल मिडिया वरवीं सांगलें, डिप्रेशनाचेर उपचार कार्यावळी इतल्या व्हड प्रमाणांत चालीक लावपी गोंय हें पयलें राज्य जालां. राज्याचे मानसीक भलायके खातीर हें एक म्हत्वाचें पावल. हाका लागून मानसीक भलायकेच्या मळार क्रांती घडटली. उदासीनताये खातीर उपचाराची गरज बंद करपाचो हेतू ह्या उपक्रमा फाटल्यान आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
