भांगरभूंय | प्रतिनिधी
दुर्भाट : सोमारा 19 जानेवारीक सकाळीं दाट धुकें पडिल्ल्यान दुर्भाट आनी आडपय सावन रासय वचपी फेरीबोट सकाळीं 7 वरां सावन बंद दवरिल्ली. ती 8.30 वरांचेर सुरू जाली. ताका लागून वेर्णें उद्देगीक वसणुकेंत, वास्को, पणजी, मडगांवां कामाक वचप्यांक सुमारा भायर त्रास जालो. कांय जाणांक कामाचेर दांडी मारची पडली.
आडपय- रासय वा दुर्भाट- रासय हो प्रवास कामगारांक लागींचो आसा. चार चाकी गाडयो तशेंच दुचाकी चालक इंधन वाटावता, वयल्यान तिकेटू ना हे खातीर चडशे लोक हे फेरीबोटीचो वापर करतात. फेरीबोट ना जाल्यार रतांकां बोरी मार्गान व्हड भोंवताडो मारून वच्चें पडटा.
सोमारा दाट धुक्याक लागून दोनूय फेरीबोटी बंद दवरिल्ल्यान लोकांची खूब धांदळ जाली. कांय कामगारांनी कामाक कळाव जातलो, हे खातीर सरळ दांडी मारली. कांय प्रवासी फेरीबोट कर्मचाऱ्यांक विनवणी करताले, जाल्यार कांय जाण दादागिरीची भास वापरून उलयताले. खरें म्हणल्यार हे न्हंयेचेर सरकारान बेगीन पूल बांदून लोकांचे हाल बंद करचे, अशेंय कांय प्रवासी उलयताले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
