भांगरभूंय | प्रतिनिधी
ह्या वर्सा 12 मार्चाक दांडी यात्रेक 95 वर्सां पुराय जालीं. भारताच्या स्वातंत्र्य झुजांत दांडी यात्रेक खूब मोटें म्हत्व आसा. गांधीजीन केल्लो हो मिठाचो सत्याग्रह हो भारताच्या स्वातंत्र्य चळवळींतलो एक म्हत्वाचो इतिहासीक खीण.
1882 त ब्रिटिशांनी मिठाचो कायदो “SALE TAX” लायलो आनी कायद्याचो त्रास सगल्या भारतीयांक जालो. ह्या कायद्या प्रमाण मीठ तयार करपाचेर आनी विकपाचेर ब्रिटीश सरकाराचो ताबो आशिल्लो. भारतीयांक मीठ तयार करपाक आनी विकपाक मनाय आशिल्ली. भरमसाठ कर दिवन मीठ विकतें घेवचें पडटालें. गरीब लोकांक तें परवडनाशिल्लें.
अन्याय जाता तेन्ना तो जायत्या लोकांच्या लक्षांत येता. लोक आपले परीन निशेध करतात. लेखक त्या अन्याया आड बरयतात. पूण जेन्ना हो अन्याय एक खूब व्हडल्या जनमानसांचेर जाता, तेन्ना एक फुडारी जाय पडटा. भारताच्या स्वातंत्र्याच्या झुजांत ह्या देशाक गांधीजीच्या रुपान तो फुडारी मेळ्ळो. पूण देश स्वतंत्र जालो तातूंत गांधीजींचें योगदान कितें असो प्रस्न कांय नेणार लोक विचारतात.
गांधीजी खातीर सामान्य मनशाचे प्रस्न म्हत्वाचे आसले. तांणी ह्या प्रस्नांक स्वातंत्र्य चळवळी कडेन जोडले. घडये हेच खातीर ते भारताच्या स्वातंत्र्य चळवळींतले सगल्यांत व्हडले फुडारी आशिल्ले.
मिठाच्या माध्यमांतल्यान एकठांय येवपी हजारांनी लोक हेंच दांडी यात्रेचें येस. तांणी संवसाराक दाखोवन दिलें फक्त क्रांतीकारीच न्हय जाल्यार सामान्यातलो सामान्य मनीस हो स्वातंत्र्य चळवळीचो भाग जावं येता.
12 मार्च 1930 त साबरमती आश्रमांतल्यान दांडी यात्रा सुरू जाली. सकाळीं 6.30 क 61 वर्सां पिरायेचे गांधीजी आपल्या 78 सहकार्यां बराबर साबरमती आश्रमांतल्यान भायर सरले आनी हो खीण कॅमेर्यांत सासणाचो दवरपाक सुमार 12 फिल्म कंपनीं तांचे कॅमेरा घेवन सज्ज आशिल्ल्यो. फक्त भारतांतल्योच न्हय जाल्यार विदेशी फिल्म कंपनीं लेगीत आशिल्ल्यो. ब्रिटीश मुव्हिटोन (इंग्लंड), पाथे (फ्रान्स), पॅशमाऊंट आनी युनिव्हर्सल (अमेरिका), फॉक्स मुव्हिटोन, जे आर्थर रँक, डॉयशे ओकेन्श्यू (जर्मनी) ह्यो विदेशी कंपनीं. हांकां जीं उपकरणां लागतालीं तीं व्हरपाक ह्या कंपनींचें जायते ट्रक उबे आशिल्ले. हाचे वेल्यान गांधीजी कितले लोकप्रीय आशिल्ले हाचो अदमास येता.
नेहरू आनी कांय काँग्रेसीतले फुडारी दांडी यात्रे विशीं दुबावीत आशिल्ले. पूण गांधीजीक दूरदिश्टी आशिल्ली.
24 दीस चलून 6 एप्रील 1930 त सकाळीं 8.30 क दांडी हांगा चिमीटभर मीठ काडून गांधीजीन मिठाचो कायदो मोडलो. ‘आपणें मिठाचो कायदो मोडलो आतां पुराय देशान तो मोडचो’, अशें आव्हान तांणी केलें. पुराय देशान विद्रोह केलो. ते खातीर गांधीजीक आनी देशांतल्या सुमार 60 हजार लोकांक अटक जाली.
जेवणांत मीठ कमी पडलां अशें
सांगतना आपल्याच देशांत तयार जावपी मीठ मेळोवपाक लेगीत सत्याग्रह केल्लो हें याद दवरचें. 61 वर्सांचे पिरायेचेर सुमार 387 किलोमिटर चलून चिमटीभर मीठ उखलून ब्रिटीश साम्राज्य हालोवपी आमच्या राष्ट्रपित्याक नमन करचें.
संपदा कुंकळकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
