भांगरभूंय | प्रतिनिधी
जीएसटी उणो केले उपरांत खरेदीक बरो प्रतिसाद
भांगरभूंय । प्रतिनिधी
पणजी : केंद्र सरकारान जीएसटी दरांत केल्लो उणाव तशेंच सणा उत्सवांच्या काळांत गाडी डिलरां वतीन दिल्ली ऑफर ह्या कारणांक लागून गोंयांत गाडी खरेदींत वाड जाल्या. सुदारीत जीएसटी दर 22 सप्टेंबरा सावन लागू जाला जाल्यार 2 ऑक्टोबराक दसरो आशिल्लो. ह्या 11 दिसांच्या काळांत 5537 गाडयांची खरेदी जाल्या. हाचोच अर्थ दिसाक 503 गाडयांची खरेदी जाल्या. वट्ट विक्रेंतल्यो 5054 गाडयो खाजगी वापरा खातीर घेतल्यात. दिवाळीच्या सणाक लागून फुडल्या कांय दिसांत गाडयांची विक्री आनीक वाडपाची शक्यताय आसा.
केंद्र सरकारान नवी गाडी खरेदी वयले जीएसटी दर उणें केल्ले. 22 सप्टेंबर सावन हाची अंमलबजावणी सुरू जाली. आदीं दुचाकींक 28 टक्के जीएसटी लागू आशिल्लो. 22 सप्टेंबरा उपरांत तो उणो करून 18 टक्क्यांचेर हाडलो. आदीं लक्झरी सोडून हेर मोटारींक 28 ते 31 टक्के जीएसटी अदीक 1 ते 3 टक्के सेस दिवचो पडटालो. 22 सप्टेंबरा उपरांत जीएसटी 18 टक्के केलो, जाल्यार सेस माफ केलो. हाका लागून गाडयांचें मोल उणें जालें. गाडी कंपनींनी उणे केल्ल्या जीएसटीचो फायदो करून दिलो.
केंद्र सरकारान जीएसटींत बदल जातलो, अशें जाहीर केले उपरांत गोंयांतल्या विवीध डिलरांनी मोटारीच्या दरांत श्रेणी प्रमाण 40 हजार ते 1.50 लाख रुपया जाल्यार दुचाकी दरांत 5 ते 20 हजार रुपयां मेरेन सूट दिली. नवरात्रां, दसऱ्या निमतान दिल्ल्या ऑफरींक लागून गाडयांचें मोल आनीक उणें जालें. हाका लागून गिरायकांनी व्हड प्रमाणांत गाडयो खरेदी केल्यो. मेळिल्ले म्हायती प्रमाण वयल्या 10 दिसांत वट्ट विक्रींतल्यो 3695 खाजगी दुचाकी (66 टक्के) जाल्यार 1419 खासगी मोटारी (26 टक्के) आशिल्ल्यो.
दसऱ्याक 1347 गाडयांची खरेदी
गोंयांत 1 आनी 2 ऑक्टोबर ह्या दोन दिसांत 1347 गाडयांची खरेदी जाली. तातूंत 349 मोटारी जाल्यार 883 दुचाकी आसात. ह्या काळांत 40 ल्हान प्रवासी जाल्यार 36 ल्हान म्हाल व्हरपी गाडयांची खरेदी जाली. वयल्या दोन दिसांत गाडी नोंदणी तशेंच हेर करांच्या स्वरुपांत येरादारी खात्याक 5 कोटी रुपयां परस अदीक महसूल मेळ्ळो.
वट्ट नोंदणेंतली 9 टक्के नोंदणी 11 दिसांनीच
गोंयांत 1 जानेवारी ते 2 ऑक्टोबर ह्या काळांत वट्ट 60 हजार 638 गाडयांची नोंदणी जाल्या. तातूंतल्या 9.13 टक्के गाडयांची (5537) नोंदणी ही फक्त 22 सप्टेंबर ते 2 ऑक्टोबर ह्या 11 दिसांतूच जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
