भांगरभूंय | प्रतिनिधी
सं वसारीक पर्यटन दीस आयज 27 सप्टेंबराक मनयतना गोंयच्या पर्यटनाची दिका बदलपाचो वावर नेटान सुरू जाला हें सरकार सांगतलें. सैम, इगर्जो, देवळां, उत्सव, जेवणा- खाणांच्या अचूक दायजाची वाट भोंवडेकारांक दाखोवपाची तजवीज जावची.
संवसारांत, देशाच्या कोनशार हुंवार येतात, कुपां फुटून गांव बुडटात तेन्ना भोंवडेकारांच्यो नदरो भारत, गोंयचे दिकेन आसतल्यो. हवामानांतले बदल संवसाराक जांचतात तेखातीर आयज मेरेन जाल्ली अती उदरगत जापसालदार ना अशें न्हय. उदरगत फक्त बांदकामांची, बांदकामाच्या कोयराचीच न्हय जाल्यार म्हायती तंत्रगिन्यानांतल्यान जी कोयराची निर्मणी जाता ती भलायकेक, सैमाक त्रासाची.
राजकारणांतलीं राजकी झगडीं, उतराक उतरांची जाप पर्यटन सोंपचें ना हेखातीर सादूर रावचें पडटलें. सदांच एकामेकांचेर नकारात्मक उतरांचो कोयर कित्याक शिंवरप? समाज माध्यमांतल्यान विचार परगटायतना विशयाचो जाणकार आसप समा जातलें.
बदलपी समाजमन पळयल्यार फुडली एक पिळगी सगलो वेळ सरकाराक खेपत रावता. दुसरे वटेन तांणी बरें केल्लें तोखणावपीय आसात, हें न्हयकारूंक जायना. सकारात्मक जावन शांतिकायेन पळयल्यार जावपी बदलांतल्यान भारत व्हड, म्हासत्ता जाता हें कळटा. आमच्या देशाचे राजकारणांतले विदेशी इश्ट दुस्मान जावन कित्याय कितें उलयतात तें फट, सत आदीं समजून घेवपाची गरज उप्रासता. उलयतना चुकी जावप तो दोश तांचो न्हय, तांचे पिरायेचो, तांच्या अपेसाचो.
नवरात्रांनी आयिल्लो संवसारीक पर्यटन दीस गोंयच्या खांची कोनशांनी पावोवपाचो निश्चेव सरकारान केला. कार्यावळीय जातल्यो, नवरात्रांतल्या कार्यावळींक गांवचे ल्हान व्हड वांटेकार जातना भलायकेक बरें शिवराक, ताजें जेवण, खाण मेळटलें ही जतनाय घेवची.
राजकारणांतले तंटे, झगडीं विसरून इश्ट, दुस्मान एकठांय जातले, शाळा, हायस्कुलांतले सरस्वतीक नमस्कार करतले, गळ्यांत गळो घालून फोटेय काडटले. समेस्तांक तांचे वांगडा फोटे घेवपाची संद मेळटा. एक मतींत दवरात कार्यावळीक उत्सवाचें रुप येता तेन्ना थंय अनवळखीय फोट्यांक उबे रावतात. अशे वेळार समेस्तां परस राजकारण्यांनी अती सादूर रावपाची गरज आसता. तेच अनवळखी त्याच फोट्याचें राजकारण कित्याक करचे नात?
कार्यावळींक हजार येतात, हजारां मदीं भुजांक भूज लावपी अनवळख्यां भितर बदनाम, चोर, डाकूय आसूंक शकतात. हे जाणविकायेंतल्यान राजकारण्यांनी समेस्तांची वळख करून घेवची पडटा. वळखींतल्यान पिराय कळ्ळयार बरी.
विदेशांतले न्हय देशांतले पर्यटक, भोंवडेकार घराब्या भायर वचून पर्यटना कडेन पळोवंक लागल्यात. लग्नां, नोकरी, वेवसाय, साहित्यांतले इश्टागतींतल्यान भोंवप जाता. संमेलनां, परिशदो, जागृताय, मनरिजवण ही ताचीं रुपां. थंय मर्याद, शीममेर आसता, खेटाखेट जाल्यार एकामेकांक सांबाळून घेवपय जाता. धा पर्यटकांच्या चोंब्यांनी एक कुसकें तांतीं, नाल्लय आसता तेन्ना कुसक्यांक अळंग कुशीक काडपाची तांक चोंब्यांच्या लिडराक आसची. लिडर शांती इबाडावपी आसत, एकचाराचें, बदलाचें म्हत्व ताका खबर नासत जाल्यार उजो लागपाक कळाव लागना. लिडराक उजो केन्ना पेटोवप, पालोवप ती जाणविकाय आसल्यार नियोजनांतल्यान पेटपी उज्यांतल्या इंगळ्यांची धग लागना, हुलपना.
अंदूंच्या संवसारीक पर्यटन दीसा चार्टर्ड विमानां आयलींच ना, पर्यटक ना असो बोवाळ जातलो. एक मतींत दवरात संवसारांत हवामान शास्त्रांतल्या बदलांचेर भासाभास जाता.चंद्र, सूर्य आनी हेर गिऱ्यांचेर वचपी साधनसुविधा, नव्या गिऱ्यांचो सोद, सॅटलायटसांचो उपेग वाडटा. हालींचो पर्यटक शाणो, शिकिल्लो, उंचेलें शिक्षण घेतिल्लो. ताका हवामान शास्त्रांतल्या बदलाची म्हायती घडयाळ, मोबायलार मेळटा. उंचेलें शिक्षण घेतिल्लो भोंवडेकार त्या म्हायतीच्या फाटल्यान लागून, म्हायती निमाणें मेरेनच्या वळीं मेरेन वाचून जापसालदार जाता.
जापसालदार पर्यटकाक कितें जाय ती म्हायती तो आदींच राबित्याचे सुवातेर कळयता तेन्ना ताका भावपी पर्यटनाचें दार उक्तें जाता. भोंवडेकारांक तांचे भाशे बराबर देश, राज्याची राज्यभास, राज्यभाशेंतल्यान येवकार मेळ्ळो, तकटे दिसले, मोबायलार म्हायती मेळ्ळी जाल्यार आडमेळीं पयस जातलीं. थंयच अंदूंच्या संवसारीक पर्यटनाच्या दिसाच्या विशया कडेन (थीम) खऱ्या अर्थान वचप शक्य जातलें.
पर्यटनांतले शाश्वत – चड तेंप तिगपी स्थित्यंतर, बदल हो अंदूंच्या संवसारीक पर्यटन दिसाचो विशय. गोंयांत येवपी देशी, विदेशी भोंवडेकारां मेरेन विशय व्हरतना थळाव्यांक त्या विशयाची, पर्यटनाची म्हायती दिवपाक सर्ती जातात. चित्रां, निबंद, नाटकुलीं, नाचांतल्या सर्तींतल्यान विशयाची मांडणी जातली. समाजाक, विद्यार्थ्यांक पर्यटनाचे सर्तींत हाडटना परिक्षेचे दिसपटयेंत बदल जाल्ले आसत, नासत पूण विद्यार्थ्यांक उर्बा मेळटली परगटायिल्ल्या विचारांची खोलाय तपासल्यार भुरगीं स्वतंत्र बुद्धीमत्तेचीं, दुसऱ्याचेर अती निंबून आशिल्लीं तें कळटलें.
गोंयच्या नवरात्रांक अजूनय मनरिजवणेचें व्हड रुप येवंक ना. गोंयचीं नवरात्रां म्हणल्यार देवळांतली देवी, देवाचें मखर. माळो घालप.अंत्रुजेतली महालक्ष्मी, शांतादुर्गा, म्हाळसा, पेडणेंची भगवती, मडकयची नवदुर्गा, सांतेर, लक्ष्मी, कामाक्षी, महामाया, अश्टभुजा, वैश्णोदेवी. मखरांत देवीच न्हय देवय बसतात, देश विदेशांतले म्हाजनय येतात. तांकां कितें भावता? देवळांची भोंवतण, शिस्त. ताज्या खाण-जेवणां इतलेंच पियेवपाचें नितळ उदक.
गोंयचीं देवळां, इगर्जेच्या वाठारांतल्यो न्हंयो, व्हाळ, तळयांची नितळसाण पर्यटनाचे वाडीक उपेगी. कवी बाकीबाब बोरकार हांचे कवितेंतल्या नाल्लाचीं भूंय गोंय ना पूण सैम सांगात आसा, बुडबुड्याचें, कमळाचें तळें, दोंगर गोंयांत आसात. सैम सांगांतांतले पर्यटन, दर्यावेळेर राखण, कोयर वेवस्थापन, स्पायस प्लान्टेशनां, मयेचें तळें, मंद मंद पांयजणां वरी संगीत, दर्याची गाज गोंयच्या पर्यटनाचें देखणे रुप. तें तिगयतना दर्यांत पेंवपा पसून भोंवडेकारांक पयस दवरपाचो निर्णय सरकारान घेवप बरो. नकारात्मक प्रसिद्धींतल्यान वाट काडीत गोंयचें पर्यटन मुखार वता, इनामांय जोडटा. सोरो पियेवन गाडी चलोवंक नाकात, गोंयचें नांव घाणावपी घुंवळे वखदां पसून पयस रावात, नितळसाणी पासत उबारिल्ल्या सुविधांचो उपेग करात ह्यो सुचोवण्यो पर्यटकांक मोबायलार दिवच्यो पडटल्यो. देवळां, इगर्जीन वतना भेसाची नेमावळ पर्यटकांक कळोवप बरें.
सर्तींतल्यान गोंयच्या पर्यटनाक काळें खत लावपी येतले तेन्ना तांकांय नितळ करपाक, कायद्यान उठाबशी काडूंक लावपाक पर्यटन खात्यान तयार रावचें. नवरात्रांत आयिल्ल्या पर्यटन दिसाचें म्हत्व सवस्तकायेंत लिपलां. सवस्तकाय राजकी, समाजीक, भौशीक, भेस भाशेंतली आनीक बाजारांतलीं. ती तिगोवप, नितळसाणींत पर्यटकांक ओडून व्हरप, नव्यो वांटो भोंवडेकारांक दाखोवप गरजेचें. गोंय काश्मीर न्हय, आकांतवादी न्हयच. गोंय शांतिकायेची, मनाक धादोसकाय दिवपी भांगरभूंय.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
