भांगरभूंय | प्रतिनिधी
दसरो हो एक उत्सव, जो वायटाचेर बऱ्याचें, अधर्माचेर धर्माचें आनी फटीचेर सत्याचें जैत मेळयता. ह्या उत्सवाक विजयदशमी वा दुर्गोत्सव ह्या नांवांनय वळखतात. कारण हे दीस दुर्गा देवीन महिषासुराचेर जैत मेळयिल्लें. ‘दशहरा’ ह्या उतराचो संस्कृत अर्थ ‘ज्या दिसा धा वायट मुखामळां (धा मुखी रावण) हारलीं, भगवान रामान तीं नश्ट केलीं,’ असो जाता. देखून दरवर्सा हो शुभ दीस व्हडा उमेदीन मनयतात.
हे परबेंतल्यान आमकां कांय म्हत्वाचे धडे शिकपाक मेळटात. ते आमी सदांच मतींत दवरूंक जाय.
1) अहंकारी जावचें न्हय
निमाणें रावणाचो पराभव जावपाक कारणीभूत थारिल्ली मुखेल गजाल म्हणल्यार तो आपले शक्ती आनी गिन्याना विशीं अहंकारी जाल्लो. ताचो अहंकार खंयच्याय वास्तवा परस श्रेश्ठ जाल्लो. सगळ्यांत बुदवंत आनी विद्वान मनीस आसून लेगीत तो शेणून पडलो आनी तें फक्त अहंकाराक लागून. अशे तरेन तुमचो अहंकार केन्नाच तुमचे हारीचें कारण जावंक दिवचो न्हय. सदांच नम्र आनी विनयशील रावचें.
2) वायटाचेर बऱ्याचें जैत
वायट स्वताक सामर्थ्यवान अशें मानपाक लागलें तरी निमाणें वायटाचेर बऱ्याचेंच जैत जातलें, हे केन्नाच विसरूं नाकात. दसऱ्या दिसा रावण, मेघनाद, कुंभकर्ण ह्या राकेसांचो शेवट जाता. ज्या कोणाकूय राग, अभिमान, हांव, क्रूरपण आनी अहंकार अशीं दुश्टपणां आसात तांकां निमणें तीं लासपाक मेळटात हाचें दसरो हें प्रतीक.
3) सत्य आनी धर्म हेच जैतिवंत
जेन्ना जेन्ना मनीस सत्याच्या वटेन आसतलो, विस्वास दवरात, जैत ताचेच आसतलें. सतत धर्माचो आनी सत्याचो मार्ग तुमच्या जैताक पावतलो. तेन्ना सुवार्थ, लाचारी पयस मोखून सत्याचे वाटेन रावात.
4) सामान्यांक केन्नाच कमी लेखूं नाकात
खंयचोच सामान्य मनीस ताचें कसलेंच वायट करपाक शकचो ना अशें रावणाक दिसतालें. देखून भगवान ब्रह्मा कडल्यान वर मागता आसतना ताणें आपल्या मरणाक कारणीभूत जावपी मनशांचो उल्लेख केलो ना. देखूनच रावणाक मारपाक भगवान विष्णून मनशाच्या रुपान जल्म घेतलो. अशे तरेन तुमी ज्या मनशाक उणें समजतात ताका केन्नाच उणो लेखचो न्हय आनी सतत नम्र रावचें.
हे कांय मुळावे तरी खूब बळिश्ट धडे, जे ह्या उत्सवाच्या मुळाव्या संदेशा वयल्यान दरेकल्याक मेळपाक जाय.
अक्षदा सावंत देसाय
[email protected]
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
