भांगरभूंय | प्रतिनिधी
भांगरभूंय । खबरां मेज
पणजीः दवर्ली- मडगांव हांगा डॉ हेडगेवार विद्यालयाच्या आवाठांतलो कोयर तशेंच सेंद्रीय कोयर उबारून व्हरून व्हो वाठार नितळ करपाचो तशेंच ते संबदीचो अनुपालन अहवाल 15 डिसेंबर मेरेन सादर करपाचो आदेश गोंय राज्य बाल हक्क आयोगान घन कोयर वेवस्थापन म्हामंडळ ( एसडब्ल्यूएमसी) तशेंच साश्टीच्या बीडीओक दिला.
मायणा- कुडतरी, दवर्ली- दिकरपाल आनी सां जुझे दे एरियल पंचायत वाठारांतले लोक आपलो कोयर हाडून हेडगेवार विद्यालया लागसर आशिल्ले सुवातेंत वडयतात. तशेंच लागीं आशिल्ले चिकन शॉपवाले आपलो सेंद्रीय (ऑर्गेनीक) कोयर थंय हाडून उडोवपाक लागल्यात. ताका लागून ह्या वाठारांतल्या येवपी घाणयाऱ्या वासाक लागून विद्यार्थ्यांचे भलायकेचेर गंभीर परिणाम जावपी भिरांत उप्राशिल्ल्यान आयोगान हो आदेश दिला.
साश्टीच्या बीडीओन मायणा-कुडतरी, दवर्ली- दिकरपाल आनी सां जुझे दे एरियल आनी घन कोयर वेवस्थापन म्हामंडळाची जोड बसका घेवन कोयराचो व्हो प्रश्न सुटावो करपाक आयोगान सांगलां. तशेंच बसकेचे इतिवृत्त सादर करपाची लेगीत सूचोवणी केल्या.
फाटल्या तीन सप्तकां सावन हेडगेवार विद्यालया सामकारचे सुवातेंत कोयर पडून आसा. तो कुसून तांची घाण सगळे कडेन येता. मायणा-कुडतरी, दवर्ली- दिकरपाल आनी सां जुझे दे एरियल पंचायतीची घरांनी वचून कोयर एकठांय करपाची वेवस्था सारकी नाशिल्ल्यान लोक आपलो कोयर हाडून हे सुवातेर उडयतात अशें बाल हक्क आयोगान केल्ले तपासणे वेळार उक्ताडार आयलें. घाण तशेंच जळेरांक लागून विद्यार्थ्यांक मलेरिया तशेंच दमो आनी कातीचीं दुयेंसा जावपाची भिरांत आसा. चिकन शॉपवाले कोंबयो मारले उपरांत जें उरता तें हे सुवातेंत हाडून उडयतात. कोयर वेवस्थापन म्हामंडळ तशेंच थळाव्यो यंत्रणा हो कोयर उबारून व्हरपा कडेन आडनदर करतात अशें दिसून आयलां. आपलो आदेश मेळ्ळ्या उपरांत दोन दिसांत पुराय सुवात नितळ करपाक आयोगान तांकां सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
