भांगरभूंय | प्रतिनिधी
भांगरभूंय । खबरां मेज
पणजीः तमाशा आनी वारी ह्यो महाराष्ट्रांतल्यो दोन म्हत्वाच्यो अश्यो सांस्कृतीक परंपरा दलित समाजान अभिव्यक्तीचीं माध्यमां म्हणून वापरली ताका लागून तांचें वैचारीक म्हत्व तिगोवपाची गरज आसा अशें नामनेचे फोटो पत्रकार संदेश भंडारे हाणी सांगलें. मुझियम ऑफ गोवा पिळर्णा हांगा मोगा संडे खाला तशाशा आनी वारीची परपंर ह्या वाख्यानांत तांणी ह्या कला प्रकाराचें म्हत्व सांगलें
भंडारे फाटल्या वीस वर्सा सावन तमाशा आनी वारीच्यो परपंरा आपल्या कॅमेऱ्या वरवीं फोटोबद्ध करतात. ह्या कला प्रकाराचें दस्तावेजीकरण करपा खातीर तांणी कलाकार आनी भाविकां वागंडा बरोच प्रवास गेला. “तमाशा- एक रांगडी गंमत” आनी “वारी- एक आनंदयात्रा” ही तांची पुस्तकां तांच्या फोटोग्राफीचें दर्शन घडयतात.
तमाशा आनी वारी भौशीक मनरिजवण आनी उपासनेचे प्रकार दलितांची स्थिती हाचेर उजवाड घालपाचो आपलो एक यत्न आसा अशें तांणी सांगलें.
भारतांतली जाती वेवस्था सोपोवपा खातीर जांणी आपली जीण समर्पीत केली त्या भारत रत्न डॉ बाबासाहेब आंबेडकर हांचे जयंती दिसा भंडारे हांचें व्याख्यान दवोरिल्लें. वारी कडेन विष्णूचो अवतार आशिल्ल्या विठोबाचो भोवमान करपा खातीर एक धर्मीक परंपरा म्हणून पळयतात. मात हे सुरवेक सावन अस्पृश्य समाजाच्या बंडाचें विधान आशिल्लें. भोवजन समाजाक प्रार्थना थळांत प्रवेश मेळपा पसून आडायल्लें. तांणी देवू आनी आळंदी ह्या गांवांतल्यान पंढरपूर हांगच्या विठोबाच्या देवळांत पूजा करपा खातीर वारी प्रवासाक सुरवात केली अशें भंडारे हांणी सांगलें.
तमाशा ही गांवगिऱ्या वाठारांतली मनरिजवणेची लोककल जायते फावट समाजाक तांच्या लागणुकेचो हारसो दाखयता. भंडारे हांणी उपेक्षीत लोकांच्या संघर्शाचें प्रतिबिंब कशें वापरतात हे व्याख्यानांत दाखोवन दिलें. महात्मा फुले हांणी उपेक्षीत समाजाच्या अणभवा विशीं जागरुकताय पातळपा खातीर तमाशाक कशें रुपांतरीत केले हाचेर तांणी व्याख्यानांत भर दिलो. तमाशा व्हो कलाकारांक जाय आशिल्लो खंयचोय विशय हाताळपाची शक्ती दिता. तो एक सशक्त लोककला प्रकार जाला अशें भंडारे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
