भांगरभूंय | प्रतिनिधी
केंद्रीय रस्तो येरादारी मंत्री गडकरी हांची राज्यसभेंत म्हायती
नवी दिल्ली, खबरां संस्था ः भारतांत दर वर्सा सुमार 5 लाख रस्ते अपघात जातात आनी सरासरी 1.8 लाख लोकांक मरण येता. हातूंत 66% मरणां तरणाट्यांक (18 ते 34 वर्सां) येतात. ही म्हायती केंद्रीय रस्तो येरादारी मंत्री नितीन गडकरी हांणी राज्यसभेंत दिली. काँग्रेसीचे खासदार प्रमोद तिवारी हांच्या प्रस्नाक जाप दितना गडकरी हांणी सांगलें, रस्त्यांची मुळावी बांदावळ सुदारून कायदे कडक करून लेगीत मरण आयिल्ल्यांचो आंकडो उणो करपाक सरकार पुरायपणान येस आयिल्लें ना.
केंद्र सरकारान राज्यांक आधुनीक अॅम्ब्युलन्स दिवपाची येवजण आंखल्या. हाचे खाला 10 मिनटां भितर अॅम्ब्युलन्स अपघात जाल्ले सुवातेर पावतली अशें गडकरी हांणी सांगलें. आयआयएमच्या अभ्यासाचो उल्लेख करून जखमींक वेळार उपचार मेळ्ळे जाल्यार 50 हजार लोकांचो जीव वाटावंक मेळटा अशें तांणी सांगलें.
2026 मेरेन उपग्रह टोल प्रणाली
रस्तो येरादारी मंत्री नितीन गडकरी हांणी सांगलें, 2026 मेरेन देशभर उपग्रहाचेर आदारीत टोल पद्दत चालीक लायतले. हें तंत्रज्ञान उपग्रह आनी कृत्रीम बुद्धिमत्तेचेर आदारीत आसतलें. गाडयो थाराय नासतना फास्टॅग आनी नंबर प्लेट तंत्रज्ञानाचेर वळखून टोल काडटले. हाका लागून 1500 कोटी रुपयांचें इंधन वाचतलें आनी 6,000 कोटी रुपयांची अतिरिक्त येणावळ मेळटली. जंय पयलीं टोल हुंपपाक 3-10 मिनटां लागतालीं थंय आतां हो वेळ शून्य करपाचो लक्ष्य आसा अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
